ЛОК ДА ШОЙЧЧЫ, ЧЕРИ КЫЙ

Визябӧжын вежон чӧж вӧлі туризм сӧвмӧдӧм кузя семинар, кодӧс котыртлісны экономика министерство да «Коми войтыр» котыр. Ветлісны сы вылӧ и миян районса «Визув» ООО-ӧн веськӧдлысьяс Николай Алексеевич да Марина Анатольевна Гичевъяс. Кыкнанныс бӧр локтісны туризм кузя удж нуӧдӧм вылӧ сертификатъясӧн. Кыдзи асьныс шуӧны, велӧдчӧмыс унатор вылӧ восьтӧма синъяссӧ. А велӧдӧмаӧсь финнъяс, кодъяс корӧмаӧсь участвуйтны татшӧм жӧ семинарын Суомиын. Финляндияӧ ветлӧм бӧрын гозъялы вермасны сетны международнӧй сертификатъяс.

Гичевъяс туризм кузя удж нуӧдӧны 2000 восянь нин, кор йӧзлы шойччӧм вылӧ медводдза керка стрӧитісны Кадамын. Ӧні налӧн угоддьӧяс Ручгуяг тыын, Сьӧд кӧджын, Подкадамьеын. Примитӧны чери кыйысьясӧс, туристалысьясӧс, шойччысьясӧс, позьӧ шуны, няньӧн-солӧн, и, дерт, жар пывсянӧн. Торйӧн унаӧн волӧны гожӧмын, быд вежон пӧшти 20 мортӧн.

Гӧсьтъясӧн вӧліны да миян вӧр-ваӧн любуйтчисны эз сӧмын ас республикаса да Россияса, но и Германияса, Польшаса да весиг Намибияса войтыр.

Кыдзи пасйӧ М. А. Гичева, водзын уджыс юрвывтыр. Колӧ лӧсьӧдны туристъяслы маршрутъяс, кыпӧдны выль стрӧйбаяс, вӧчны Кадамын 100 метр кузя пирс, дасьтыны вертолётлы пуксянін. И сьӧмтӧг нинӧм оз артмы. Но 4 морта котыр оз усь сьӧлӧмӧн. Туризм сӧвмӧдӧмыд — выгӧдаа делӧ. Тайӧс важӧн казялісны суйӧр сайын, кӧть нин сійӧ жӧ финнъясыс. Налысь опыт босьтӧмӧн, районлысь аслыспӧлӧслун артыштӧмӧн «Визув» кӧсйӧ правдайтны нимсӧ: лоны визулӧн выльсикас удж панӧмын.