ОРДЙЫСИСНЫ ТУРИСТЪЯС

Спортса туризм кузя кубок вылӧ районса ордйысьӧмъяс мунӧны во чӧж некымын тшупӧдӧн. Кольӧм воын вермыліс Кулӧмдінса котыр. Таво ордйысьӧм ковмис заводитны мӧд тшупӧдсянь, сы вӧсна мый медводдза вылӧ эз вӧв сьӧм. Декабр 12 лунӧ ордйысьӧм восьтан флаг кыптіс Немдінын Р. Г. Карманов нима школалӧн спортзалын. Локтісны котыръяс район пасьтаысь, но мыйлакӧ эз вӧвны помӧсдінсаяс да скӧрӧдумсаяс. Вын-сям петкӧдлісны велӧдчысьяс 10 арӧссянь босьтӧмӧн. Спортлӧн мукӧд петкӧдчӧм серти тані колӧ повтӧмлун: вуджӧны, кӧв кузя кыссьӧмӧн, «пропасьт», акробатъяс моз котӧртӧны кӧв кузя нӧшта джуджыдджык «пропасьт» вомӧн «скала» дорӧ да лэччӧны сэсянь — весиг сыркмунлӧ сьӧлӧмыд. Тадзи ӧмӧй вермӧны миян челядь? Вӧлӧмкӧ, вермӧны. Подулыс — велӧдчӧмын, помся тренируйтчӧмын. Татшӧмъясыд ни вӧрын, ни ва вылын, ни гӧраясын оз воны пикӧ, доръясны и мукӧдӧс. Пелька вӧдитчӧны быдсяма кӧлуй-эмбурӧн: гезъясӧн, карабинъясӧн, мукӧд кутчысянторъясӧн. Вӧр-ваын, гӧраясын колӧ лоны дасьӧн дзик быдтор кежлӧ, вермас конъявны весиг ичӧтиктор. Вунӧдін пасьтавны каска, эновтін инструмент, кепысь, эн куж кӧртавны кӧв — пыр и тӧдчас водзӧ вылӧ. Тайӧ ордйысьӧмын ӧткымын спортсменӧс падмӧдіс кӧвйӧ унапӧлӧс гӧрӧд вӧчӧм.

Медшӧр судья Анатолий Басырович Хайрединов пасйис:

— Оз позь личлэдзчысьны некутшӧм ногӧн. Тані кӧ повзян, кыдзи верман ачыд дорйысьны да дорйыны мукӧдӧс неминуча дырйи либӧ маршрут вылын?

— Ошкана, мый спортсменъяс быдтор кежлӧ дасьӧсь, — вермасьӧмъяслы кывкӧртӧд вӧчигӧн пасйис челядьлысь дзоньвидзалун сӧвмӧдан районса шӧринӧн веськӧдлысь Елена Дмитриевна Кузнецова. — Но водзын нӧшта сьӧкыдджык ордйысьӧмъяс, кытчӧ мунасны талунъя вермысьяс пӧвстысь медбуръяс.

А вермысьӧн петіс кодкӧ да кодкӧ пӧшти быд котырысь — Озъягысь, Немдінысь, Югыдъягысь, Кулӧмдінысь, Дереваннӧйысь, Лӧгинъягысь, Ручысь. Нывъяс пӧвстын медвынаӧн лоис Анна Шахова (Пожӧг), зонъяс пӧвстын Руслан Гевейлер (Югыдъяг). Котыръяс лыдын медводзӧ петісны Пожӧг, Дереваннӧй–1 да Кулӧмдін–1 командаяс. Пожӧглы вичмис районлӧн ичӧт кубок.