ВУЖЪЯС

Код тӧдас, кыдзи веськаліс Немдінса джуджыд вичколӧн пӧката вевт вылас тайӧ пуыс. Кольӧм воӧ вӧлі нэриник на, но коръя жӧ. А таво кыптіс-нюжӧдчис кык сывйысь джуджыдджыка. Кӧйдыссӧ, дерт жӧ, вайисны лэбачьяс либӧ тӧв. И со некутшӧм мутӧг, сӧмын, гашкӧ, чукӧрмӧм бус вылас кыддзыс лэдзис вужъяс. А ӧд вичко вевтыс жӧчысь.

Водзвыв тӧдса пуыслӧн рӧкыс: коркӧ сійӧс быть нетшыштас тӧв либӧ исковтӧдас тувсовъя уль лым. Но вӧрзьӧдӧ кыддзыслӧн асныра, водзсасян этшыс. Тадзи жӧ быдсикас тӧвъяс-бушковъяс бертісны миян му вылысь вичкояс да енлы эскӧм. Но эскӧмыс кутчысис, эз сетчы, и ӧні со выльысь сӧвмӧ, паськӧдӧ вужъяссӧ йӧз сьӧлӧмъясын. Тайӧс позьӧ шуны, кыдзи ловзис орчча вежа Троича вичкоыс. Пыран да, юрыд бергӧдчас мичлунысла. И йӧзыс, Енлы эскысьыс, татчӧ люзьгӧмӧн локтӧ.