ЭСКӦМ

Тулысбыд асывъяснас любуйтчи ӧшинювса куръяын уялысь мойӧн. Некыті абу помӧма, позйыс оз жӧ тыдав, а со петас югдандорыс бадьяс пиысь да польскӧдчӧ то ӧтарын, то мӧдарын. Вичко чурк йывсянь бура аддзан, кыдзи локтасны гӧгрӧс гыторъяс кыськӧ куръя йывсянь. Сӧмын гоз-мӧдысь и мыччысьлас сьӧд юрыс. А сэсся звер тӧдлытӧг котӧртас-вуджас тупкысьӧм нин вис бердті Эжваӧ. Видзӧдан да, уялӧ мӧдлапӧлын нин, кылӧдны дасьтӧм пуръяс дорын. Мыйла овмӧдчыліс татчӧ мойыс? Ӧд черитӧ сійӧ оз сёй, а помӧм вылӧ местаыс абу. Гашкӧ, сикт дорад озджык ков повны пищаля йӧзсьыд? Тані ӧд, керкаяс дорад, лыйсьыны оз позь. Ӧти пӧрйӧ татшӧмторйыс вӧлі нин: куръяӧ овмӧдчыліс вурд. Мунан пелыса пыжнад да кыдз тай муркнитас-петас сиктладорса ӧзынӧ тюрӧдӧм трактор ли машина кӧлеяысь, бузнитас-суныштас — сы мында и аддзывлан.

Аръявылыс мой эз нин петавлы, эз нин розьӧдлы-писькӧдлы куръяӧ гежӧдика вӧйтлан кулӧмъяссӧ. Гашкӧ, вешйис кытчӧкӧ лӧньджыкинӧ, а, гашкӧ, и кодлӧнкӧ киыс лэптысис на эскысь-сибӧдысь звер вылас. Коркӧ тай Тимшерын эз жалитны посёлок дорын тулысбыд олысь юсьясӧс. Лыйлісны, а сэсся яйсӧ вузавлісны.