ГИБДД-ЫН «УЗЬӦНЫ»

Во кык сайын республикаса конкурсын вермӧмысь сетісны дона козин. Но радлыссьӧма водзджык. Недыр мысти воис налогӧвӧй инспекциясянь кабала: колӧ пӧ гижны вося доходъяс кузя декларация. Мися, менам некутшӧм гуся доход абу, а явӧсьыс век мынта воттӧ, висьтаси налогӧвӧйӧ пыралігӧн. А тэныд пӧ Госсӧветсянь козин сетӧмаӧсь, и кӧнсюрӧ йӧзӧдчылӧмыд на. Колӧ пӧ вештыны налог, лоас на и пеня. Кытысь нӧ, мися, тӧданныд козин йывсьыс? А ми пӧ унатор на быдӧн йылысь тӧдам, шуисны инспекцияад.

Збыль тай тадзи вӧлӧма. Таво воис юӧртӧм, мый меным колӧ мынтыны вот «Минск» мотоциклысь, коді 20 гӧгӧр во нин абу. ГАИ-ын на киритлі учёт вывсьыс номерсӧ сдайтӧмӧн да сідз шусяна утилизация вылӧ шыӧдчӧм гижӧмӧн. Киритісны, и сэсянь некутшӧм налог эз волы.

А ӧні со — бара кабала. Бара пыравлі налогӧвӧйӧ. Сэсянь ыстісны ГИБДД-лӧн юкӧнӧ, мед пӧ пасъясны, мый мотикыс абу учёт вылын. Но погонаясыд и кывзыны эз кӧсйыны та йылысь. Компьютерын пӧ абу некутшӧм юӧр, мый гижлі шыӧдчӧм. Да ӧд, шуа, номерыс весиг тайӧ абу менам, а мӧд мортлӧн. Тэнад пӧ и ставыс. И тшӧктісны выльысь гижны шыӧдчӧм, мый быттьӧкӧ утилизация вылас сеті таво на. Садьмӧмаӧсь. Да нӧшта ӧлӧдісны: ковмас мынтысьны нӧшта некымын тӧлысь. Ме лои мыжанас! Дӧзми да шуи: судӧ сета, а ог мынтысь абутӧм транспортсьыс, кодӧс законнӧя киритлісны нин. Сет пӧ, вочавидзисны ГИБДД-саяс, тэнад право.

А налӧн эм право, компьютер вылӧ ыстысьӧмӧн, сетны налогӧвӧйӧ абу збыль юӧръяс? Кытчӧ нӧ вошис сы мында во сайын сдайтӧм номер да шыӧдчӧм?