УСЬӦМА НЕЛЯМЫН КЫКӦДЫН...

Неважӧн Калуга обласьтысь «Поиск» котырса корсьысьысьяс аддзӧмаӧсь нӧшта ӧти миян земляклысь коляссӧ. Медальон сертиыс тӧдмалӧмаӧсь усьӧм салдатлысь ним-вич-овсӧ. Сійӧ вӧлӧма Кулӧмдін районса Немдін сиктысь петлӧм морт — Иосиф Тимушев.

Республикаса «Паметь книгаысь» лыддям, мый Немдінса зон чужлӧма 1921 воын. Фронт вылӧ сійӧс босьтлӧмаӧсь 1942 вося февральын. Вӧлӧма десантникӧн. Юӧртӧг вошӧма 1943 вося октябрын.

Но медальон сертиыс Иосиф Тимофеевич Тимушев збыльвылас усьӧма 1942 вося октябрын, Калуга обласьтса Зайцевлысь мыльк плацдарм дорйигӧн.

Немдінса библиотекар Анна Липина шуӧ, тыдалӧ пӧ, сорасьӧмаӧсь «Паметь книга» лӧсьӧдысьясыс. Од тӧдса, мый салдатлӧн рӧдвужыслы ыстылӧмаӧсь похоронка да весиг индылӧмаӧсь мынтыны ичӧтик пенсия. Сідзкӧ, салдат збыльысь воштӧма юрсӧ кось-тыш дырйи, а абу веськавлӧма пленӧ...

Иосиф Тимушевӧс помнитӧ на уджвывса ветеран Аксинья Романовна Тимушева. Сійӧ ёртасьлӧма зонлӧн Маша чойыскӧд. Нывбаба казьтылӧ, мый Ӧсип быдмӧма ыджыд крестьянскӧй семьяын, войнаӧдзыс на уджалӧма «Гӧрд шонді» колхозын.

Ӧні чужан сиктас Тимушевлӧн рӧдвужсьыс некод нин абу ловъя. И век жӧ Немдін администрацияӧн веськӧдлысь А. В. Тимушев да школаса велӧдысь В. Г. Шешуков корсьӧмаӧсь да аддзӧмаӧсь салдатлысь чойсӧ, Мария Тимофеевна Прокушеваӧс (Тимушеваӧс). Нывбаба уна во олӧма Пальын, а ӧні нэмсӧ коллялӧ нылыс ордын — Эжваын.

Эня-нылалы лоӧма зэв нимкодь, кор кывлӧмаӧсь Ӧсип Тимушевлысь коляссӧ аддзӧм йылысь.

Калугаса корсьысьысьяс юӧртӧмаӧсь, мый тышъяс бӧрын аддзӧм салдатъяслысь колясъяссӧ, на лыдын и Ӧсип Тимушевлысь торпыригъяссӧ, дзебасны братскӧй гуӧ август тӧлысьӧ. Артмас-ӧ вокыслӧн да дядьыслӧн гу дорас ветлӧмыс, Прокушеваяс (Тимушеваяс) оз на тӧдны. Но ӧтитор шонтӧ ставнымлысь сьӧлӧмнымӧс: нӧшта ӧти салдатӧс лючки-ладнӧ лэдзасны гуӧ, да лоӧ нин кытчӧ волыны копыртчывны рӧдвужыслы...