ЭШТӦДАСНЫ АС КАДӦ

Выль школа кыптӧ Немдінын. Важыс дзик нин киссян выйын, сыысь и видзчысь, мед челядьлӧн юр вылӧ йиркыс оз усь. Стрӧитлісны эськӧ эз на важӧн, но васӧдінад ӧдйӧ вешъяліс-вежнясис.

Выльсӧ «Беркана» котыр лэптӧ сикт шӧрын, сэтчӧ, кӧні водзті, гашкӧ, нэм сулавліс пуысь вӧчӧм кык судтаа велӧдчанін. Рӧкыд вылӧ, сійӧ сотчывліс. Тшынйыв кайис и велӧдчӧм вылӧ сы пыдди дасьтӧм интернатлӧн керкаыс.

198 велӧдчысьлы тайӧ стрӧйбасӧ ылӧсалӧмӧн шуӧма помавны тавося коймӧд кварталын. Сиктса олысьяс ёна виччысьӧны, мед эськӧ сентябрь ӧтиӧд лунӧ выль школаыс восьтіс нин ӧдзӧссӧ. А татшӧм зіля кӧ кутасны и водзӧ уджавны стрӧитысьясыс, ас кадӧ эштӧдны позянлуныс эм. Велӧдчан класс-кабинетысь ӧтдор тані лоӧны и спортзал да бассейн.

Выль школатӧ да нӧшта та ыдждатӧ восьтӧмыс тӧдчана абу сӧмын районлы, но и республикалы. Сійӧс кыпӧдӧмсӧ син улас кутӧны республикаса Юралысь да правительство. Тӧдчана пай пуктӧ и нималана политик Ф. Г. Карманов. Сылӧн Ремир вокыслысь нимсӧ сетӧма сиктса школаыслы. Феликс Григорьевич пырӧ водзмӧстчысь котырӧ, коді лӧсьӧдчӧ нимӧдны сиктын да ставнас Немдін вожын тӧдчана лоӧмторсӧ. Школа воссигкежлӧ петас велӧдчысьяслӧн да велӧдысьяслӧн казьтылӧмъяса небӧг, шуӧма дасьтыны и ыджыд фотоальбом.

Ревир Карманов нима школа, став сертиыс, аслас сойборд улӧ босьтас и матігӧгӧрса сикт-посёлокысь ныв-зонмӧс, ӧд сӧмын Немдінысь 200 велӧдчысьыд оз чукӧрмы. Майбыр, туйяс ӧні эмӧсь, и автобусыд тшӧтш. Гашкӧ, сӧмын юсайса Смолянкаысь челядьӧс сьӧкыдджык лоӧ новлӧдлыны тулыс-арнас.

«Северстрой» ООО, коді и лоӧ генпӧдрадчикнас, «Беркана» котырӧс медалігӧн кутіс тӧд вылас, мый выль школасӧ кыпӧдігӧн отсасьны мӧдасны и татчӧс олысьяс. Бур вӧчӧмас ассьыныс пай пуктысьясыс эмӧсь нин. Стӧрӧжъясыс сиктсаяс жӧ.

Эскыссьӧ: немдінсалы ёна колана стрӧйбаыс лоӧ дась урчитӧм кад кежлӧ.