ПАСА НИМЛУН

Сідзи артмис, мый чужан лунъясным миян ӧтлаасисны Эдуард Тимушевкӧд (шонъянӧй нин), уджавліс «Коми муын», Кӧрткерӧсса «Звездаын» главнӧй редактор Эдуард Пименовкӧд да Кулӧмдін районса вӧвлӧм юралысь Сергей Каплинкӧд. Ставнымлӧн август 21 лунӧ.

И со, кор ме коли районса газетысь редакторӧс вежысьӧн, медводдза лист бокас сеті юӧр зэв ыджыд шыпасъясӧн: район пасйис 80 во, а С. П. Каплин — 50 арӧс. И муртса гижышті, кыдзи гӧсьтъясыс сёйисны-юисны турбазаын. А газетлӧн зэв ичӧтик пельӧсын петіс жӧ пасйӧдтор, мый республикаын тӧдса гижысьяс Э. Тимушев да В. Бабин тайӧ жӧ лунас пасйисны ассьыныс нимлунъяссӧ. И сӧмын дженьыд кыв: «Найӧс пӧся чолӧмалісны уджвывса ёртъясыс».

А мӧд лунас звӧнитӧны администрациясянь, волы пӧ, сёрни эм. Лэччи администрацияад, пыри веськӧдлысь дорас. Сійӧ скӧр, мыйла нӧ пӧ тэ став сёйӧм-юӧмсӧ гижӧмыд. Мися, ме ӧд эг лыддьӧдлы, мый тіян пызан вылын вӧлі, чигъя яй али гӧрд чери. А пасйысьӧмтӧ казьтышттӧг эськӧ кутшӧм жеб юӧр лои.

Сергей Петрович лаймис, лок пӧ, бурджык кофе юам. А сэсся друг пызансьыс кыскӧ кутшӧмкӧ кабала и ичӧтик тубрас на. Тайӧ пӧ тэныд республикаса Юралыссянь Почёт грамота да содтӧд на командирскӧй часі.

Дерт, весьӧпӧран. Корӧны сідз шусяна «ковёр» вылӧ, а бергӧдчӧ тадзи. Кыкнаннымлӧн тай нимлуныд коли пасаӧн.