ДЕРЕВАННӦЙ СИКТӦЙ — МЕНАМ СЬӦЛӦМШӦР

Шуӧны, гажтӧма пӧ олам. А пӧшти быд вежон то ӧти сиктын, то мӧдын праздник: Носимын и Керчомъяын, Косланын и Выльгортын. Вӧлі сійӧ и Дереваннӧйын.

Район пасьталаысь волісны татчӧ пасйыны Иван лун да ӧти сайын нимӧдны сиктыслы 350 во тырӧм. Гажсӧ котыртысьясыс бура думыштӧмаӧсь сійӧс нуӧданногсӧ. Позис бурпӧт любуйтчыны ывлавывса мичӧн да сьылысь-йӧктысьяслӧн удаллунӧн. Гӧсьтъяслы петкӧдлісны сиктса музей, нуӧдлісны восьтыны выль ФАП, вӧзйисны донъявны киподтуйсӧ енбиа серпасасьысьяс Ким Ветошкинлысь да Ангелина Кирушевалысь.

Кыдзи и быд коми сикт, Дереваннӧй паськыда нималӧ енбиа да уджач йӧзнас. Художникъясысь ӧтдор татысь петісны гижысьяс, учёнӧйяс, артистъяс, лётчикъяс. Ӧти Кузнеч Васьыслӧн (В. Н. Чувьюровлӧн) мый дон сулалӧ талантыс. Гаж пестысьяс лыдын сійӧ вӧлі жӧ. Нималана журналист да писатель Александр Ульяновлӧн водзмӧстчӧмӧн буретш юбилей кежлӧ Сыктывкарын петіс «Дереваннӧй сиктӧй — менам сьӧлӧмшӧр» небӧг, коді оз сӧмын паськыда восьт сиктлысь историясӧ, но и пыдісянь тӧдмӧдӧ сэтчӧс бур йӧзкӧд. Найӧс нимӧдӧм гӧгӧр и гартчис гажыслӧн сюрӧсыс. Творческӧй коллективъяслӧн сьыліг-йӧктігмоз лудвывса сцена вывсянь юргисны нимъясыс налӧн, кодъяс пуктісны да пуктӧны ыджыд пай сиктлысь слава озырмӧдӧмӧ. Эз кольны вунӧдӧмаясӧн и Чужан мунымӧс Ыджыд косьын дорйысьяс. 427 морт ветліс татысь фронт вылӧ, бӧрсӧ бергӧдчисны сӧмын 191-ыс. Ӧні сиктын кык ветеран и колисны, ӧтиыс, Екатерина Ивановна Чувьюрова, 94 арӧса нин. Шуны кӧ, менам пӧль Андрей Саввич Бабин, коді директоравліс татчӧс школаын, сідзжӧ пуктіс юрсӧ фронт вылын.

Сиктсаясӧс юбилейӧн чолӧмалігӧн районса юралысь Сергей Каплин пасйис, мый сы серти, кыдзи радейтӧны дереваннӧйсаяс ассьыныс чужанінсӧ, татчӧс видз-мусӧ, лышкыд пармасӧ, паськыд ота Эжва-матушкасӧ, кыдзи пуктӧны пыдди пӧль-пӧчлысь традицияяссӧ, позьӧ шуны: нэмӧвӧйся Дереваннӧйлӧн аскиа луныс лоӧ югыд. Сиктса да посёлокса зарни киа, кыпыд лола йӧз гижасны оз на ӧти лист бок Комилӧн да Россиялӧн историяӧ. Мед и збыльмасны бурсиӧмъясыс.