ВУЖВОЙТЫРЛӦН ШУӦМӦН?
Кыдзи тӧдса, Эжва йылын вӧр пилитан вынйӧра завод босьтчис кыпӧдны «ЦентроВудКом» котыр, кодӧн веськӧдлӧны Польшаса «Центрозап» фирмасянь. Мый бурсӧ ваяс районса олысьяслы выль предприятиеыс, гырысь-ӧ вежсьӧмъяс лоӧны вӧр овмӧсын, ёна-ӧ тӧдчас Комиын да весиг Россияын вӧвлытӧм на производствоыс вӧр-ва да вужвойтырлысь оласног видзӧм вылӧ? Тайӧ да уна мукӧд юалӧм кыптыліс Кулӧмдінса администрацияын «Коми войтырӧн» котыртӧм неважӧнся аддзысьлӧм вылын. Районса, меставывса администрацияясӧн веськӧдлысьяс, райсӧветса депутатъяс, «Коми войтыр» ӧтмунӧмӧ пырысьяс водзын висьтасисны «ЦентроВудКомса» генеральнӧй директор С. Позняк да сійӧс вежысь Е. Рузаева.
Заводсӧ стрӧитны урчитӧма нёль во. Став вӧчасян уджыслӧн доныс матӧ 2.800 миллион шайт. Выль предприятиеын зільысь 1.000 гӧгӧр морт кутасны вонас лэдзны 750 сюрс кубометр пиломатериал. Шыбласыс, позьӧ шуны, оз ло, ӧд кутасны вӧдитчыны мирын медся ӧнія технологияясӧн. Пилитӧмторсьыс чукӧртӧм конструкцияясысь позяс тэчны зэв бур оланінъяс. Вӧр колясыс, весиг пилипызь, мунас электростанциялы ломтас вылӧ.
Станислав Позняк да Елена Рузаева эскӧдісны, мый «Монди СЛПК»-ӧн кӧртымӧ босьтӧм вӧръясын моз жӧ выль овмӧс аслас угоддьӧясын мӧдас тӧждысьны пармаӧс пӧжаръясысь видзӧм, керасъясын том пуяс садитӧм-пуктӧм вӧсна. Сэсся, тіянын пӧ медводз зільӧны унджык вӧр пӧрӧдны, а кыдзи сійӧс петкӧдны, мӧвпалӧны бӧрыннас нин. Овмӧс мӧдас нюжӧдны выль туйяс. Та вылӧ 2008–2020 вояс кежлӧ артыштӧма 2.590.560 сюрс шайт. Ӧти сайын лоӧ вӧр посёлокъясын олысьяслы бур ветлан-мунанін. Ме ачым коркӧ ветлі Удораӧ да чуймӧдіс, мый сэні уджалысь болгара нюжӧдісны бетон плитасӧ муртса эз делянкаӧдз. Выль кӧзяин кӧсйӧ тадзи жӧ: и вӧр мед воис падмӧгъястӧг, и йӧзыслы мед вӧлі бур.
Дерт, кӧсйӧмыд этша на. Унатор тай кӧсйысьліс «КомиВудСис» котыр, коді поздысьліс Помӧсдін вожӧ, но мый сылӧн артмис? Эз весьшӧрӧ майшасьны Мысса администрацияӧн веськӧдлысь Валентин Паршуков, «Комилесбизнес» котырӧн юралысь Александр Игнатов, республикаса Юралысьлӧн районса общественнӧй приёмнӧйысь главнӧй специалист Антонина Кузнецова, мый беддьыд кык пома. Ӧтарнас вӧчам йӧзлы бур, а мӧдарнас... Мыйта вӧр пузувтӧны бокысь воӧмаяс, мыйта лёк лоӧ вужвойтырлы. Бырӧ зверь-пӧткалӧн поздысянін, урӧсмӧны нэмӧвӧйся вотчанінъяс.
Коми Республикаса Госсӧветӧн веськӧдлысьӧс первой вежысь Валерий Марков серти, выль заводыс отсалас Кулӧмдін районлы дорны содтӧд сьӧм, сетас позянлун чинтыны уджтӧмалӧм, но оз ков вунӧдны, мый Эжва йыв — Коми мулӧн аслыспӧлӧс пельӧс, кӧні коми оласноглӧн вужъясыс. Колӧ быть кутны тӧд вылын татчӧс олысьяслысь тӧжд-майшӧгъяссӧ.
— «Коми войтырлӧн» Кулӧмдін районса представительство тайӧ сёрни вылас оз сувт, — шуис сыӧн веськӧдлысь Надежда Русинова. — Ми пыр кутам видзӧдны, кыдзи уджалӧ «ЦентроВудКом», оз-ӧ дзескӧд мыйӧнкӧ вужвойтырӧс. Сідзсӧ выль заводыс колана абу сӧмын районлы, но и республикалы. Миян олӧмным кутчысьӧ вӧр овмӧс вылын, и сійӧс сӧвмӧдтӧг водзӧ он мун. Тадзи жӧ кымын пасйис и районса юралысь Сергей Каплин. Завод стрӧитан проект кӧ збыльмас тырвыйӧ, Эжва йывса сикт-посёлокъясын унатор вежсяс бурланьӧ. Уджыс пансис нин, и миянлы колӧ кывкутны, мед некутшӧм тшупӧдын сійӧ эз торксьы.
