РЕГЫД ДЗУЗГАНТӦ ВУНӦДАМ
Гожӧм — дзоньтасян кад. Тшӧтш и би сетан овмӧсын. Бур кӧзяиныд мӧвпалӧ оз сӧмын локтан тӧв йылысь, но и ставсӧ вӧчӧ водзӧ видзӧдӧмӧн. Ӧд энергетикаыд сэтшӧм юкӧн, кодтӧг йӧзыс да предприятие-организацияяс оз вермыны бергӧдчыны весиг ӧти лун.
Лунвыв электрическӧй сетьяслӧн Кулӧмдінса филиалӧн веськӧдлысь Алексей Тарабукин сідзи и шуӧ: бурджык ӧні дасьтысьны гӧгӧрбок, мед бӧрыннас эз ковмы шыбласьны-корсьны нелючкисӧ. И мед эськӧ районса олысьяс гӧгӧрвоисны, мый быть лоӧ кусӧдлыны бисӧ налысь жӧ майшасьӧмъяссӧ бырӧдӧм ради.
Кольӧм во, кор примитісны Помӧсдін — Войвож электролиния, ӧдйӧ вылӧ йитчылісны сідз шусяна кокньӧдӧм схема серти. Ӧні ставсӧ вӧчӧны талунъя, бурмӧдӧм технологияӧн. Кулӧмдінын да Помӧсдінын капремонт нуӧдігӧн сувтӧдалӧны дзик выль оборудование. Уджалӧ «Новоуральскса промышленнӧй компания» аслас некымын бригадаӧн. А Кулӧмдінса да Немдінса подстанцияясын войяснас подувсяньыс дзоньтасисны РЭС-са специалистъяс. Июльын дзикӧдз лоӧ вежлалӧма важ сетьяс Кебанъёльын. Сэні мӧдасны зільны Кировса 24-ӧд мехколоннаысь уджалысьяс, кодъяс таӧдз став линиясӧ выльмӧдісны Ручын.
Кебанъёльын, кыдзи и Ручын, ВЛ–0,4 кВ вылын воддза лемень сутуга пыдди лоӧны «кыша» проводъяс. «Торсада» нюжӧдӧмысь лоӧ уна буртор. Ӧти-кӧ, линияыс крепыдджык да абуджык ӧпаснӧй. Шуам, фазаса проводъяс кӧ гартыштчасны либӧ инмасны ӧта-мӧдас, токыс оз кучкы. Мӧд-кӧ, проводыс кӧ усяс муӧ либӧ орас, напряжение вежласьӧм понда оз сотчыны электробытӧвӧй приборъяс. Водзті таысь жугавліс йӧзлӧн уна телевизор-холодильник. Тайӧ тӧлысьнас, дерт, кебанъёльсаяслы ковмас мырсьыштны би кусласьӧмла, но бӧрыннас лоӧ этшаджык майшӧг.
— Линияяс выльмӧдан уджсӧ эштӧдам во помӧдз, — эскӧдӧ Кулӧмдін РЭС-ӧн веськӧдлысь. — Сьӧмыс та вылӧ эм, да и мукӧд отсӧг на пыр чуктӧ «Рытыв-Войвывса МРСК»-сянь, асланым «Комиэнергосянь».
* * *
Алексей Михайлович Тарабукин — районса предприятиеясӧн медбур веськӧдлысьясысь ӧти. Сылӧн коллективыс республикаса энергетическӧй овмӧсын век водзмӧстчысьяс лыдын. Мортыс оз шыблась кывъясӧн. Сідзкӧ, Эжва йылын дзузган йывсьыд регыд дзикӧдз вунӧдасны.
