ВАД ТЫ ДОРЫН ГУДӦК ГОРӦН...

Сизим верста сиктын кылӧ

Сизим пӧвста гудӧк гор.

Ок и лӧсьыд Эжва йылын,

Льӧмйыс дзоридзалӧ кор.

Збыльысь, зэв мича кад бӧрйӧмаӧсь керчомъясаяс сиктлысь гажсӧ нуӧдны. Гӧрӧм-пуктысьӧм помасис, видз вылӧ петны водзджык на. Сӧмын мудйысьны колӧ, но коді нӧ коляс бокӧ сы ыджда праздникысь, ӧд дзоридзалысь Вад ты бердын таво сійӧс нуӧдісны дас витӧдысь нин. Небыдик тӧвру пӧльтіс, шондіыс эз сэтшӧма пӧж да, сьылысь ывланас любуйтчигтыр сиктсаяс и гӧсьтъяс гажӧдчисны сёр рытӧдз.

Керчомъясаяс бура дасьтысьӧмаӧсь гӧсьтъясӧс примитігкежлӧ. А волісны найӧ район пасьталаысь да тшӧтш и республикаысь. Кодкӧ локтӧма чужанінас да рӧдвужсӧ видлігмоз, кодкӧ — ас синъясӧн видзӧдлыны нэмӧвӧйся сиктлысь аслыспӧлӧс гажсӧ. Носимын тадзи жӧ пасйӧны Троича, Дереваннӧйын — Иван да Скӧрӧдумын — Петыр лунъяс. Быдлаын казялан коми оланру, ассьыным сьылан-ворсанног, но Керчомъяын праздниклӧн сюрӧсас гартыштӧны торъялана сер, коді буретш лӧсялӧ чери кыйысьяслӧн да гудӧкасьысьяслӧн сиктлы. Тайӧ — пыжъясӧн ветлӧм.

Гажыслы подув пуктысьясысь ӧти — Прометей Чисталёвлӧн мӧвпыштӧм серти, став ворсӧмыс мунӧ ва вылын. Вад ты ӧтар-мӧдарсянь локтӧны ӧтувъя гажӧдчанінӧ мичаа вӧччӧм нывъяса пыжаяс. Сьыланкывъяс, теш-гаж, гудӧкъяслӧн юралӧм. Ставныс сэсся вуджӧны ыджыд пур вылӧ, кӧні пансьӧ асшӧр артистъяслӧн петкӧдчӧм. Вӧлі мӧвп лӧсьӧдны торъя пур вылӧ и кафе сямаӧс. Но таво эзджык ло сідзи, кыдзи кӧсйисны. Быдтор вылӧ ӧд колӧ сьӧм, шуам, сійӧ жӧ пуръяссӧ вӧчны, а кытысь сійӧс корсьны, ӧд оз на быдӧн уськӧдчы отсӧгӧн предпринимательяс Пётр Попов да Николай Гичев моз. Аттьӧ, на коддьӧмлӧн да меставывса администрациялӧн водзмӧстчӧмӧн век жӧ артмис кыпыд гажыс. Дерт, и культура керкалӧн зільӧмӧн.

Нималана «Козин» котырӧн веськӧдлысь Нина Лодыгина кужӧма кыскыны тыбердса сцена вылӧ сиктса став арлыда йӧзӧс. Петавлісны гажӧдны сиктса медся ичӧт сьылысь-йӧктысьяс и школаысь верстьӧджык велӧдчысьяс, а сідзжӧ нывбаба-ветеранъяс. Найӧ и ыззьӧдісны мукӧдлаысь воӧм коллективъясӧс. Майбыр вӧлі кывзыны гожся видз весьтын юргысь гӧлӧсъяссӧ Лидия Логиновалӧн «Зильган турун» ансамбльлысь, Кулӧмдінса «Северяночкалысь» да Дереваннӧйса «Коми аньяслысь». Колӧ шуны, мый «Зильган турунас» ӧні сьылӧ «Козинлӧн» быдтасыс — Наталья Траилина, кодлӧн петкӧдчӧмыс быттьӧ выйӧн мавтыштіс землякъясыслысь сьӧлӧмъяссӧ. Эз ӧд прӧстӧ сійӧ неважӧн на шедӧд «Мелодия единства» фестивальын лауреат ним да кутас нимӧдны Россияса Рытыв-Войвылӧс Москваын нин.

Сьылӧм-йӧктӧм, быд сикас юанторйӧн да пӧжасӧн чӧсмасьӧм, юква панялӧм... Гажыс вочасӧн ӧддзис. Ӧти сайын эз вунӧдны и сиктса бур йӧзӧс, торъя семьяясӧс нимӧдӧм йылысь. Налы вичмисны козинъяс. Эз пасйытӧг кольны и спортивнӧй ордйысьӧмъясын вермысьясӧс. Праздник нуӧдысьяс ставсӧ вуджӧдісны тешӧ да шмоньӧ. Но медся вӧрзьӧдана вӧлі пыжӧн панласьӧм. Кӧть и ордйысисны ӧти пыжӧн, мужичӧйяскӧд тшӧтш удаллунсӧ петкӧдлісны и нывбабаяс. Дас гӧгӧр мортысь медӧдйӧ мӧдлапӧлӧ вуджавлісны Андрей Булышев да Валентина Тарабукина. Горзӧмӧн да велӧдӧмӧн ышӧдісны йӧзыс сынысьяссӧ. И торйӧн нин шызьывліс берегыс сэк, кор ӧти ордйысьысь муртса эз вӧйт веткисӧ.

Сигӧртны кӧ, «Пыжа гаж» мукӧд воын серти муніс эз гажтӧмджыка. Гашкӧ, та вылӧ тшӧтш тӧдчисны районса да сиктса юралысьяс Сергей Каплинлӧн да Любовь Траилиналӧн бурсиӧмъяс. Ноко пӧ, керчомъясаяс, петкӧдлӧй сямнытӧ да аслыспӧлӧслуннытӧ, ті ӧд пӧ век нимавлінныд уджавны и гажӧдчыны кужӧмнад. И ӧткымын тырмытӧмтор вылӧ видзӧдтӧг, Эжва йывлӧн культура олӧмӧ праздникыс збыльысь колис ассьыс пас.