МИКАЙЛӦ НИМА ГӦСЬТ?

Парчса олысь Надежда Лодыгина асывнас, кыдзи и пыр, вӧтліс мӧссӧ ӧтувъя йирсьӧдчанінӧ. Сиктгорувса Зупугув местаын чукӧртчылӧ 30 сайӧ пемӧсӧдз. Видзӧны пастукъяс быд овмӧсысь ӧчередьӧн. Орчча Лебежнӧй грездын кӧ скӧтыс йирсьӧ ас кежас, тані сійӧ век нин видзӧдлас улын.

Но артмис сідзи, мый Надежда Ивановналӧн сюрукыс торйӧдчис стадаысь, пырис вӧрӧ, кытысь и кылісны сылысь лёк ногӧн баксӧмсӧ. Вайсян кад нин вӧлі да, гашкӧ, сійӧн сайӧдчис. Сиктсаяс ӧдйӧ кыпалісны, уськӧдчисны отсӧг вылӧ, но вӧлі сёр нин: вӧрасӧ ёна дойдалӧм мӧскӧс ковмис начкыны. Вайсьытӧгыс. Ӧтияс чайтісны, мый доймӧма ачыс, мӧдъяс эскӧдісны, тайӧ пӧ ош парсалӧма. Мужичӧйяс весиг ветлісны корсьны сылысь кок туйсӧ, пуктывлісны вой кежлас сам. Ошкыд, веляммис кӧ, бара на быть петас корсьны сёянтӧ. Но Микайлӧӧс ӧнӧдз некод на эз аддзыв.

Мый гожӧмнас шӧйтысь зверьяс матыстчылӧны йӧзлӧн оланінлань, Эжва йывса сикт-грездъясын абу выльтор. Во-мӧд сайын Керчомъяын ош ли кӧин джагӧдіс йирсянінас дас гӧгӧр пемӧсӧс. Кодсюрӧ аддзывлӧмаӧсь руд рӧзбойникъяссӧ, но найӧс кыйысь абу петӧма, кӧть и пакӧститчысьяс йылысь юӧрыс шызьӧдліс став сиктсӧ.

Таво Ичӧт Куж дорын кодкӧ талялӧ жӧ картупель муяс, лякӧ вӧрбердса видзьяс. Висьталӧны, сиктса ӧти олысь весиг казявлӧма войнас туй вывті мунысь ар джынъя кымын ошкӧс. Но ачыс мортыс та йылысь эз паськӧдчы: гашкӧ, эз и ош вӧв. Век жӧ, биыд пӧ тшынтӧг оз овлы. Вӧр-ваын олӧмыс сэтшӧма пузувтчис, мый сэтчӧс ловъя ловъяслы быть лоӧ суседавны йӧзкӧд. Сэсся кынӧмпӧтыд кокниджыка шедӧ сикт дорсьыд. Тулыснас Пятигорскса аньлы сюрӧма ӧшинь увсьыс дом йылас джагӧдӧм понйыс. Эз жӧ мӧд пон йир голясӧ.