ПРӦСТ КАДСӦ КОТЫРТӦ ВИЧКО

Аслысногӧн котыртісны челядьлысь гожся каникулсӧ Кулӧмдінса уджалан да шойччан лагерын, коді кольӧм воын моз жӧ воссьыліс Петыр-Павел вичко бердын. Челядь медводз сулалісны молебен вылын. Кӧть и эз ставӧн юрбитны, вежа ай Александрлысь туйдӧм-велӧдӧмсӧ кывзісны пыдди пуктӧмӧн.

Таво лагерыс вӧлі куим вежонся. Томулов унатор слӧймисны вӧчны: бертісны пуктасъяс улӧ му, сувтӧдалісны потшӧс сюръяяс, идралісны лӧп-ёг. Нёль зонка отсасисны ветеранъяслы.

11 часын ӧтув юисны тшай, а гортаныс разӧдчытӧдз пажнайтісны. Бара жӧ дженьыдик молитва бӧрын. Сёян-юан вылас сьӧмсӧ бур сьӧлӧмӧн сетісны предпринимательяс Н. Зубко, В. Пархоменко, З. Родионова, а Н. Сладкоштиева вичмӧдіс вӧлӧга. Вичко бердын и пусисны да, пажыныс артмис ёна донтӧмджык столӧвӧйысь ньӧбасьӧм дорысь. Челядьӧс видзӧм вылӧ сьӧмсӧ торйӧдіс и районса зонпоснилӧн творчество керка, кытысь лагерас 25 мортсьыс вӧлі унджыкыс.

Уджалӧмысь кындзи, дерт, ныв-зон и бура шойччисны. Вӧлі экскурсия сяма орчча кык судта вичкоын, кӧні водзті видзлӧмаӧсь Владимирскӧй Ен-мамлысь ӧбраз да кодӧс лӧсьӧдчӧны жӧ дзоньтавны. Ульянаӧ куим лун кежлӧ велосипедъясӧн ветлӧмысь ӧтдор томулов волісны и Визябӧжса вичкоӧ. А июнь 15 лунсянь челядь бать-мамыскӧд гожйӧдчӧны Анапаын нин. Сэні, Капустино хуторын, Сыктывкарса да Воркутаса епархияысь владыка Питиримлӧн дачаыс, кӧні республикаса челядь шойччӧны 11 сменаӧн. Кулӧмдінсаяс 2 вежон чӧж лоӧны лунвывса саридз дорын.

— Челядьлысь прӧст кадсӧ тадзи котыртӧмӧн, — шуӧ вежа ай Александр, — ми ог сӧмын сӧвмӧдӧй наын уджачлун, но и велӧдам пыдди пуктыны православнӧй традицияяс, вежавидзӧмӧн донъявны чужанінлысь историясӧ.

Бӧркывйын содтам, мый Кулӧмдінса Петыр-Павел вичко бердын во гӧгӧр чӧж уджалӧ верстьӧяслы и челядьлы вӧскресенньӧса школа. Кулӧмдінса шӧр школа бердын регыд котыртчас и патриотическӧй клуб, кӧні челядьӧс тшӧтш кутас бурас туйдыны вежа ай Александр.