И СТАВЫС БУРА ИНАСЬӦ
Кор районса газетъяс вуджисны офсет вылӧ, сэтчӧс типографияяс воштісны медшӧр уджсӧ. Ӧд найӧс «вердіс» буретш газет печатайтӧмыс. Тадзи лоис Кулӧмдінын, Удораын, Изьваын.
Республикаын медводдзаяс лыдын компьютер отсӧгӧн босьтчисны лэдзны и Кӧрткерӧсса «Звезда». Газет кутіс петны Кировын. Типографиясаяс первойсӧ шӧйӧвошисны. Кыдзи кутчысьны водзӧ?
Сӧмын бланокъяс лэдзӧмӧн водзӧ он во. Да и быд предприятие-организацияын нин эмӧсь компьютеръясыд, посниторъяс вермасны печатайтны асьныс. Сэсся и Сыктывкарыд орччӧн, став заказсӧ сэні вӧчасны ӧдйӧ. И бура. Важмӧм машинаяснад тай места вылад сэтшӧм жӧ прӧдукция и петіс. Сідз шусяна высокӧй печатьыд эз нин кут ковны.
Но коллектив, кодӧн веськӧдліс ыджыд опыта специалист, удж вӧсна сьӧлӧмнас висьысь морт Лидия Потапова, ловнас эз усь. Ӧти-кӧ, эз вошты йитӧдсӧ важся заказчикъяскӧд, мӧд-кӧ, пыртіс уджас выльторъяс. Во-мӧд сайын ньӧбӧм ризограф отсӧгӧн позьӧ лэдзны бланокъяс, буклетъяс, небӧгъяс сідзи жӧ, кыдзи карын. Дерт, ичӧтджык тиражӧн. Медым книгаясыс вӧліны мичаджыкӧсь, налы эжӧдъяссӧ вӧчӧдӧны республикаса типографияын. Водзті нин, важ машинаяснас тані зілисны вӧчны кампет кодь мича петасъяс: вӧдитчисны уна рӧма кабалаӧн, быд сикас дзоридзӧн, торъя шыпасъясӧн. Тадзи, шуам, артмис челядьлӧн кывбуръяса небӧг. Некымынысь зэв мичаа петавліс вӧр-ва видзӧмлы сиӧм «Родничок» альманах. А «Тэнад йӧз, Кӧрткерӧс» кызкодь справочник, кодӧс юрсиктса полиграфистъяс дасьтісны неважӧн на, лоис пызанвывса сувенир кодьӧн.
— Небӧгъяссӧ лэдзны ӧні миян дорӧ шыӧдчылӧны оз сӧмын ас районса авторъяс, — висьталӧ «Полиграфист» ООО-ӧн веськӧдлысь Л. И. Потапова. — Тані петіс Сыктывкарса поэт Виктор Демидовлӧн сборник, тані жӧ «Аняби» книгаын йӧзӧдісны кывбур-висьтъяссӧ Кулӧмдін районса гижысьяс. Регыд налысь босьтчам лӧсьӧдны нӧшта ӧти петас. А ас районсаяслы ми сетам весиг кутшӧмсюрӧ кокньӧд. Шуам, донсӧ чинтыштам. Некымын историческӧй гижӧд нин печатайтім ас му туялысь Александр Панюковлысь, таво отсалім йӧзӧдчыны Шойнатыысь ӧти гижысьлы.
Типографияын лэдзӧмторъясыс бура инасьӧны. Лидия Ивановнакӧд миян сёрнитігӧн сы дорӧ пырисны Кӧрткерӧсса больничаын уджалысьяс. Бӧрйисны гоз-мӧд книгаӧн — и рочӧс, и комиӧс. Ас районса петасъяссӧ пӧ ми век ньӧбам окотапырысь.
Типография, кодлӧн керкаыслы 90 во нин, кодӧс ӧти пӧрйӧ дзикӧдз тупкылісны, а сэсся 1965 воын бӧр восьтісны, аслыс уджсӧ пыр аддзӧ. Тӧдчӧ директорлӧн водзмӧстчӧмыс. Казьтыштам, Лидия Потапова вермис республикаса «Нывбаба-предприниматель–2006» конкурсын. А сыкӧд тшӧтш зільӧны быдтор нин кужысь печатница Валентина Петровна Клермон да линотипистка Мария Захаровна Гитева. Асланыс уджысь ӧтдор и свинечтӧ сывдасны, и кабала рулонтӧ вундаласны. Да и машинаястӧ велалісны нин мавтавны-дзоньтавны.
Рыноклӧн гыяс вылын сьӧкыд кутчысьны сӧмын талунъянас да тӧрытъянас олысьяслы. Сы вӧсна и «Полиграфист» ООО-ын мудзлытӧг зільӧны бурмӧдны ассьыныс прӧдукциясӧ, мед печатькӧд йитчӧм могъясӧн йӧзыс эз мунны карӧ, а шыӧдчисны кӧрткерӧссаяс дорӧ.
