МЕД НЕКОД ЭЗ ПӦД
Дас во нин Кулӧмдін районын пӧдӧны дас да унджык мортӧн. И сӧмын кольӧм воын вӧйисны сизимӧн. 2005–2007 воясын 29 пӧдысьысь кӧкъямысыс челядь: витӧн Кужбаысь, кыкӧн Керчомъяысь, ӧти — Помӧсдінысь.
Тайӧ шог лыдпасъяс сертиыс позьӧ шуны: йӧзыс омӧля на видзчысьӧны ва вылын неминучаысь. Син увсьыс лэдзӧны купайтчысь челядьӧс, дзугӧны пыжӧн ветлан правилӧяс, петӧны кыйсьыны шома юрӧн. Тшӧкыда аддзывлан серпас: Кулӧмдінса пляж вылӧ локтӧ ёнакодь шатлалысь бать, бӧрсяньыс вӧтчӧны кык кага. Некод оз ӧлӧд, некод оз кут, кӧть и тырыс йӧзыс. Юрсиктын кӧ купайтчанінсӧ торйӧдӧма, мукӧд сикт-посёлокын шойччысьяс гожйӧдчӧны-шпольӧдчӧны кӧні веськалӧ.
Районын ва вывті ветлан туйыс 5.269 километр: Эжва, Нем, Кӧтйӧм, Прупт да мукӧд ю. Эм и 160 гӧгӧр ты, кӧні йӧзыс вӧдитчӧны пыжӧн чери кыйигӧн, вӧралігӧн, вотчигӧн. Кулӧмдінын кӧ йӧзлӧн шойччанінъясті рейдӧн ветлӧны ГИМС-са, ОВД-са, татчӧс администрацияса, «Комирыбвод» ФГУ-са уджалысьяс, мукӧдлаын тайӧ уджсӧ лэдзӧмаӧсь ас визув вылӧ. Он кӧ лыддьы ӧткымын администрацияса веськӧдлысьлысь зільӧмсӧ. На отсӧгӧн да, гашкӧ, Енмыслӧн видзӧмӧн бӧръя 4 вонас эз вӧй ни ӧти морт Аныбын, Діасёръяын, Парчын, Кебанъёльын, Мысын, Вӧльдінын.
Ичӧт суднояс кузя государственнӧй инспекциялӧн участок, коді медводз кывкутӧ ва вылын пӧрадок вӧсна, кольӧм во нуӧдӧма йӧзкӧд 140 аддзысьлӧм, сёрнитӧма 5.407 морткӧд, 25-лаӧ ӧшлӧма аншлаг-плакат, 38-ысь петавлӧма рейдӧ, гижӧма 70 протокол. Урчитӧмысь унджык кольӧм во и таво регистрируйтӧма пыжъяс. Но сійӧ ӧтнас кутны видзӧдлас улас ставнас районсӧ оз вермы. Водзмӧстчыны колӧ меставывса администрацияясӧн, предприятие-учреждениеясӧн веськӧдлысьяслы. Шуам, сійӧ жӧ шойччан-купайтчан местаяссӧ лӧсьӧдӧмӧн, йӧзӧс доръян ведомственнӧй постъяс котыртӧмӧн. Кольӧм во республикаысь йӧзӧс доръян «ПАСС» государственнӧй учреждениекӧд ӧтув вӧлі дасьтӧма 15 внештатнӧй спасательӧс, сэк жӧ уна гырысь сиктысь, кыдзи Керчомъяысь, Помӧсдінысь велӧдчыны некодӧс эз мӧдӧдлыны. Таво колӧ дасьтыны 43 мортӧс нин. Бара кутісны ыстысьны, мый лӧсялана йӧзсӧ корсьны сьӧкыд, мый постсӧ котыртны оз вермыны, пыж-мотор, дорйысян кӧлуй абу да.
Мӧйму Ичӧт Аныбын гожӧмнас уджаліс «Том спасатель» лагерь, кытчӧ челядьсӧ мӧдӧдлісны 6 школаысь. Быд сикас лоӧмторйысь видзчысьны найӧс велӧдісны весиг карса специалистъяс, тшӧтш и водолазъяс. Но мыйлакӧ сы ыджда Помӧсдін вожысь челядьыс эз волыны...
Ва вылын неминуча лыд чинтӧм кузя ыджыд сёрни неважӧн вӧлі районса администрацияын. Кыдзи и пыр, меставывса власьтӧн, предприятие-учреждениеӧн веськӧдлысьяс аддзисны уна помка, мый вӧсна оз вермыны збыльмӧдны та могысь урчитӧмсӧ. Шуам, сьӧм пӧ оз тырмы. Но ӧд Кулӧмдінын сійӧс аддзӧны. Таво торйӧдісны жӧ 20 сюрс шайт купайтчанін лӧсьӧдӧм, йӧзӧс доръян постсаяслы вештысьӧм вылӧ. Оз эскыссьы, мый мукӧдлаын оз вермыны ньӧбны вӧйӧмысь кутан жилет да кытш, нюжӧдны купайтчанінын потшӧс сямаӧс, ӧшлыны ӧлӧдана гижӧдъяс.
Таво купайтчан кадсӧ районын индісны июль 15-сянь июль 31 лунӧдз. Сэки ва вылын омӧльторъясысь торйӧн нин колӧ видзчысьны. Но тайӧ могыс вогӧгӧрса. Йӧзыс оз вермыны овны ю-ты вылӧ петавтӧг. Сідзкӧ, во чӧж и колӧ нуӧдны найӧс ӧлӧдан-туйдан уджсӧ.
