КОЛЬӦМ ТӦЛЫС ВЕЛӦДІС
Гежӧда овлӧ, мед меставывса власьт ошкис коммунальнӧй овмӧсын уджалысьясӧс. А Кулӧмдін сиктса юралысь Иван Попов районса администрацияын неважӧн чукӧртчылігӧн пӧся аттьӧаліс «Тепловодоканал» ВАК-ын зільысьясӧс. Кӧть кор пӧ он чукӧст, век ас кадӧ вӧчӧны да быд нелючки ӧдйӧ бырӧдӧны.
Збыльысь, районса жилищно-коммунальнӧй овмӧс тӧвсӧ вуджис эз лёка. Колана ногӧн дасьтіс сы кежлӧ оборудование, вайис тырмымӧн ломтас-мавтас. Но эз жӧ дзик ставыс лючки вӧв. Ускӧттьӧыс суліс 45-ысь. Медсясӧ би, шоныд да ва сетан тэчасъясын. Сідз, кор «Жилфонд» МУП пыдди котыртчис «Жилищно-эксплуатационнӧй служба» МКП, вӧлі гӧгӧрвотӧм, коді бырӧдас муниципальнӧй олан керкаясса патераясысь нелючкияссӧ. Би, ва да шоныд тэчасъяссӧ тырвыйӧ дзоньтавны сэки уджалысь «Лысва» котыр эз вермы, колана специалистъясыс эз вӧвны да. Арнас кыкысь потлісны трубаяс Кулӧмдін овмӧдчӧминлӧн котельнӧйын, тӧвнас «пышйис» шоныдыс юрсиктса жӧ Гагарин нима улича вылысь, а сідзжӧ Озъяг школадорса трубаясысь.
Недыр кежлӧ торксьыліс йӧзӧс ваӧн могмӧдӧм. «Тепловодоканал» да Лунвыв электрическӧй сетьяслӧн районса юкӧн эз сёрнитчыны да ва босьтан будкаяссӧ шонтыны босьтчисны сёрмӧмӧн. Кынмылісны Кулӧмдінса, Кебанъёльса, Дереваннӧйса колонкаяс. Ноябрын сідзжӧ пышйыліс ваыс Кулӧмдінса 15-ӧд колонкаысь «Эжва» гостиницалӧн пӧдвалысь. Январын дугдыліс воны ва Югыдъягса участкӧвӧй больничаӧ да олӧма йӧзлӧн керкаӧ. Выльӧн котыртчӧм службаысь бригадаяс эз ыстысьны сьӧкыдлунъяс вылӧ, унджыклаас уджалісны кывкутӧмӧн, йӧз вӧсна тӧждысьӧмӧн.
Тӧв кежлӧ лӧсьӧдчыны районса администрация торйӧдліс 23,6 миллион шайт. «ТВК» ВАК дзоньталіс шоныд сетан трубаяс Кулӧмдінын, Помӧсдінын, Паспомын. Кӧнсюрӧ ковмис вежлавны-дӧмлыны ва трубаяс. Олан керкаяс гӧгӧрбок дзоньталӧма лои ставсӧ 4,54 миллион шайт дон. Медым би кусласигӧн эз сувтны котельнӧйяс, Носимса клублы, Вочса школалы вичмисны сідз шусяна резервнӧй электродвижокъяс. Ӧтлаын кӧ артыштны, шоныднас да ванас йӧзӧс могмӧдӧм да няйт ва весалӧм вылӧ «Тепловодокал» во чӧжӧн видзис 69,37 миллион шайт. Бур эськӧ вӧлі, мед район лючки вуджис и локтан тӧвсӧ. Но, кыдзи пасйӧ «ТВК» ВАК-са генеральнӧй директор Виктор Воробьев, дасьтысьны лоӧ сьӧкыдджык. Шоныд да ва сетан трубаяс ёна нин важмисны, найӧс дзоньталӧм вылӧ колӧ уна сьӧм, а сійӧ оз тырмы. Медсясӧ йӧзлӧн мынтысьтӧм понда. ЖКХ-лы сикт-посёлокса олысьяс уджйӧзалісны 9.244 сюрс шайт. Ковмис сетны судӧ 82 иск, мед мырдӧн перйыны уджйӧзсӧ. Сэсся и предприятие-организацияяс лёка вештысьӧны. Районса шӧр больничалӧн уджйӧзыс миллион сайӧ нин. Ӧні со коммунальнӧй овмӧс лӧсьӧдчӧ ньӧбны 100 тонна из шом, а мый вылӧ?
Сьӧм тырмытӧм вылӧ ыстысьӧны и найӧ, кодъяс кывкутӧны асланыс овмӧсъясын дзоньтасьӧм вӧсна. «Кулӧмдінса клубъяслӧн шӧр тэчас» МУК-са директор Вера Красней шуӧ, мый клубъяс шонтан став пӧртйыс важ, 11 филиалын колӧ выль пӧв тэчны пачьяс. Огӧ пӧ лысьтӧй весиг пожъявны шоныд сетан трубаяссӧ, вермасны потны да. Мый дон сувтас найӧс вежлалӧмыс, водзвыв артыштны сьӧкыд. РОНО-ӧн веськӧдлысь Олег Холопов эськӧ эскӧдӧ, мый кольӧм во мойвиис бура дзоньтасьны кызвын школа-садъяс, мый таво став велӧдан учреждениеас вайисны нин пес, Вылыс Вочса школалы ньӧбисны бензина двигатель, вӧчисны мукӧдтор, но сентябрь 1 лунӧдз уджыс юр выв тыр на. Тайӧс жӧ тӧдчӧдіс ломтас вайӧм, ва трубаяс нюжӧдӧм, туйяс дзоньталӧм кузя висьтасигӧн юрсиктса юралысь Иван Попов, коді водзті моз став уджсӧ босьтчис вӧчны «Тепловодоканалса» да ЖЭС-са веськӧдлыськӧд ӧтув. Тадзисӧ пӧ петан туйяссӧ корсьны кокниджык. Шоныд да би сетан тэчасъяссӧ, олан керкаяссӧ локтан тӧв кежлӧ тырвыйӧ дасьтыны колӧ сентябрь 1 лунӧдз. Кольӧм тӧлыс велӧдіс нин веськӧдлысьясӧс: тайӧ могыс медся кывкутанаясысь ӧти.
