БӦРЪЯ ПУР

Тайӧ вежонас бӧръя пур босьтісны Эжва йылысь. «Немский–2» пуръясянінысь буксиръяс кылӧдісны 9,570 сюрс кубометр коръя вӧр.

Ставыс Кулӧмдін районса 6 пуръясянінын вӧлі 35 пур да 3 сідз шусяна катернӧй воз — ӧтувтӧ 259,3 сюрс кубометр, мый кольӧм воын дорысь тӧдчымӧн унджык. Сэки ва кузя кывтіс 185 сюрс кубометр. Таысь ӧтдор, таво торъя пур СЛПК-са предприятиеяскӧд мӧдӧдіс Виктор Белыйлӧн асшӧр котыр. Лэччӧдлісны заптӧмасӧ и «Тимшерлес», «Немлес», «Прупт» ООО-ясысь баржаяс.

— Предприятиеяслысь дась пуръяс видлісны босьтны апрель 29 лунӧ нин, — висьталӧ районса администрацияысь главнӧй специалист Дмитрий Тимушев, — но ваыс вӧлі ичӧт на да ковмис виччысьлыны май 9 лунӧдз. Медводз шедіс Керчомъяысь Немечпӧлӧйса пур, коді май 12 лунӧ воис нин Сыктывкарӧ.

Содтам, кылӧдчанінын уджаліс 25 катер.