КЕБАНЪЁЛЬӦ ЛОКТӦНЫ ПОЛЯКЪЯС

Республикалӧн экономикаӧ повтӧгджык кутісны вичмӧдны сьӧм суйӧрсайса компанияяс. 2010 воын медводдза прӧдукция лэдзас Эжваса вӧр переработайтан выль завод, кодӧс босьтчӧ кыпӧдны Австрияса фирма. Татшӧм жӧ завод лӧсьӧдчӧны восьтыны сэні итальянечьяс. А Польшаса «Центрозап» компания таво гожӧмнас нин заводитӧ уджавны Кулӧмдін районын.

Кебанъёльӧ неважӧн воліс акционер котырлӧн делегация, коді бӧрйис ыджыд комплекс стрӧитанін, стӧча сёрнитчис районса веськӧдлысьяскӧд федеральнӧй тшупӧдын вынсьӧдӧм проект збыльмӧдӧм кузя.

Кебанъёльын полякъяс видзӧдлісны, кӧні позяс лэптыны заводын уджалысьяслы оланін да шойччанін, юасисны, кыдзи кутас воны цехъясӧ вӧр, кодӧс позяс мӧдӧдлыны специалистъясӧс дасьтан курсъяс вылӧ да с. в. Дерт жӧ, унджыктор кӧсйисны тӧдмавны и районын олӧм-вылӧм йылысь. «Центрозап» акционер котырса генеральнӧй директор Ирэнеуш Круль, директоръяслӧн сӧветӧн веськӧдлысь Ирэнеуш Навродский, инвестицияяс кузя директор Адам Петжока да мукӧд став юалӧм вылӧ вочакыв кылісны районса юралысь Сергей Каплинсянь да сійӧс вежысьяссянь, Кебанъёльса администрацияӧн юралысь Валентина Зайцевасянь.

* * *

Выль комбинат стрӧитан уджтаслӧн доныс — 2 триллион 769 миллиард шайт. Тьӧс, плака, брус пилитӧмысь ӧтдор кутасны вӧчны олан керкаяслы срубъяс, кодъясӧн медводз могмӧдасны татчӧс уджалысьясӧс, районса олысьясӧс. Заводын лоӧ 1.032 специалист да рабочӧй. Налӧн лоас бур удждон, а районса бюджетӧ воас содтӧд сьӧм.