АБУ БИЛЕТ — ВӦРӦ ЭН ПЕТ

Эжва йылын вӧравнысӧ урчитӧма вӧлі май 9 лунсянь. 10 лун чӧж позис кыйны утка-дзодзӧг да мурквечик. Пищаля йӧз ёна виччысисны тувсовъя сезонсӧ. Но уналы сійӧ вайис и майшӧг.

Найӧ, кодъяс пырӧны Кулӧмдінса, Помӧсдінса, Югыдъягса охотобществоясӧ, вермисны ас кадӧ вештыны взнос, босьтны лицензия. А вот государственнӧй (гӧрд) билетаяс пиысь кызвыныс тайӧ документнас вӧдитчан кадсӧ нюжӧдны эз вермыны. Помка сыын, мый районын бырӧдісны госохотнадзорлӧн инспекторлысь штатсӧ. Охотовед В. А. Володин вуджис уджавны вӧр-ва видзан райкомитетӧ. Сійӧ оз вермы сетны выль вӧралан билет, нюжӧдны важнас вӧдитчан кадсӧ, а сідзжӧ гижны правилӧ дзугысьяс вылӧ протокол.

Тӧлысьнас кыкысь Кулӧмдінӧ волӧны Кӧрткерӧс районса охотнадзорын уджалысьяс А. М. Федосов да В. В. Ткачёв. Но кыдзи найӧ вермасны могмӧдны ӧтпырйӧ кык районӧс, сэк кор государственнӧй билета кыйсьысьыс сӧмын Эжва йылын 1.000 сайӧ. Сэсся юрсиктӧдзыд волыны быдӧн оз на и вермы, мый нин шуны Кӧрткерӧсӧдз лэччывлӧм йылысь.

Кулӧмдін районса вӧралысьяс шыӧдчисны «Коми му» газетӧ, мед сійӧ отсалас разьны гӧрӧдсӧ. Та могысь зільӧ нин корреспондент.

Содтам, Эжва йылысь бырӧдісны и чери видзан инспекция. Январь 1 лунсянь збыльмӧдсьӧны Войвылын чери кыян выль правилӧяс. Коді кутас видзӧдны найӧс олӧмӧ пӧртӧм бӧрся, гӧгӧрвотӧм жӧ. Сы мында угоддьӧад карса инспекторъяс волыны оз вевъявны. Шензьӧдӧ: водзті кӧ вӧралысьяс да чери кыйысьяс эськӧ сӧмын радлісны инспекторъяслӧн абутӧм вылӧ, ӧні, мӧдарӧ, натӧг оз вермыны. Тыдалӧ, гӧгӧрвоисны: вӧр-ваын пӧрадок кутысьястӧг некыдз.