МАЗАЙ ПӦЛЬЫД БЫДЛАӦ ОЗ ВЕВЪЯВ
Таво тулыснас вӧлі нин ӧти неминуча Кулӧмдін районын. Улыс Воч сиктса олысь апрель 7 лунӧ муніс чери кыйны да ӧнӧдз на туй ни ньӧв. Ёна эськӧ корсисны, но мортыс эз и сюр. Апрель 19 лунӧ муртса эз вӧйны и Лебежнӧйса кык олысь да Сыктывкарса гӧсьт, кодъяс локтісны Эжва мӧдлапӧвса вуграсянінысь. Эз кӧ тшукны пыжаяс, вермис жӧ лоны омӧльтор. Ытва сӧмын на вынсялӧ и лоӧ водзвыв ылӧсавны, мыйысь медъёна колӧ видзчысьны тайӧ кывкутана кадас.
Кыдзи и мукӧд воас, йӧзӧс дорйӧм да ускӧттьӧысь стрӧйбаяс видзӧм могысь Эжва йылын уджалӧны ӧтув и предприятие-учреждениеясса, и сикт-посёлокъясса веськӧдлысьяс. Март помын на Кулӧмдін районса администрацияын паськыда сёрнитісны ытва кежлӧ дасьлун йылысь. Районса юралысьлӧн индӧд серти котыртӧма торъя комиссия, вынсьӧдӧма, кыдзи венны виччысьтӧм лоӧмторъяссӧ. Ускӧттьӧсӧ эрдӧдӧм да бырӧдӧм вылын кутас уджавны 81 морта 16 котыр, 14 автомашина, 25 торъя техника, 7 катер, 3 шаланда, мотора кык пыж. Таысь ӧтдор, ваӧн торйӧдӧм сикт-посёлокын пӧжарысь мӧдас видзны 15 кусӧдчысь котыр. Апрель 18 лунӧ кос турун сотчис Керчомъяын да Дереваннӧйын. Ӧтилаас ветліс нин Ручысь кусӧдчысь котыр.
Эжва юын да сылӧн вожъясын валӧн «ворсӧм» бӧрся видзӧдӧны да пасйӧд вӧчалӧны апрель 1 лунсянь. Торйӧн ёна Эжва туис апрель 15 лунсянь, йиыс дзикӧдз вӧрзис апрель 18 лунӧ. Немдінын, Мысын, Пожӧгын, Кырнышаын да Вӧльдінын понтонъяссӧ ковмис мездавны, а медым эз жугласьны ичӧтджык юяс вомӧн посъяс, индыны на бӧрся видзӧдысьясӧс. Торйӧн нин ёна ковмас дӧзьӧритны Нем да Прупт вомӧн вуджанінъяс. Понтонлӧн уджавтӧм кадӧ аварийнӧй котыръясӧс вуджӧдӧм, сёян-юан да мукӧд коланатор вайӧм могысь кык катер шаландаясӧн торйӧдӧны «Тимшерлес» да «Немлес» ООО-яс, Вӧльдінын да Пожӧгын вуджӧдчасны пыжӧн.
Медся ёна майшӧдлӧ йӧзӧс да груз новлӧдлӧмыс Югыдъяг да Пожӧг вожъясын. Туй вӧчысь организацияяс понтонъяс босьтӧм бӧрын ӧвтыштӧны асланыс участок вылӧ, оз тӧждысьны вуджӧдчӧм понда. Вӧр заптан предприятиеяслӧн абу весиг та могысь оборудованиеыс да лицензияыс. Тайӧ гӧрӧдсӧ разьны район корис отсӧг республикаса правительствосянь, Комиысь МЧС-лӧн управлениесянь, прокуратурасянь.
Тӧжд кыпӧдӧ и сійӧ, мый овмӧдчӧминъяс нюжмасьӧны пӧжарысь видзчысян оборудование ньӧбӧмӧн, кӧть и та вылӧ бюджетысь сьӧмсӧ торйӧдісны. Кусӧдчан кӧлуй абутӧмла сӧмын март-апрельын Улыс Вочын сотчис куим керка. А сідзсӧ кусӧдчынысӧ эмӧсь АЦ–30 да АЦ–40 автомашинаяс. Вӧльдінӧ автоцистернасӧ сетіс Помӧсдінса лесничество, Ярашъюӧ — 192-ӧд пожчасьт, Немдін вожӧ — татчӧс овмӧдчӧмин.
— Ытва сӧмын на содтӧ вынйӧрсӧ, и асныралан кадсӧ кольӧм воын моз жӧ колӧ вуджны гырысь нелючкиястӧг, — висьталӧ райадминистрацияысь общественнӧй безопасносьт юкӧнӧн веськӧдлысь Н. Л. Белошаньгин. — Ӧнӧдз пӧшти эз на торксьывлы йӧзӧс да предприятие-учреждениеяс электричествоӧн, связьӧн, шоныдӧн, ваӧн могмӧдӧм. Став веськӧдлысьыс асланыс медшӧр могъяс кузя уджсӧ вӧчӧны кывкутӧмӧн. Мед и водзӧ тадзи лоӧ.
Вӧрын талун лымйыс уна на. Кутас кӧ нӧшта и зэрласьны, ваыс ёна на туас. Вермасны ойдны йӧзлӧн оланінъяс. Сідз, ытва кӧ вуджас Пожӧгын 630 сантиметра, а Немдінын 750 сантиметра тшупӧд, то босьтас 56 керка. Тайӧ Кекурын, Пожӧгдінын, Вомынбӧжын, Югыдъягын, Смолянкаын матӧ 240 олысьлысь. А ставыс ытва дырйи Пожӧг, Тымсер, Югыдъяг вожъясын ді вылӧ моз кольӧ 7.167 морт.
