«ДОНА» АВТОБУСАД ВЕТЛЫСЬ-МУНЫСЬЫД ОЗ ПУКСЬЫ
Кулӧмдін районса сӧвет пыртіс вежсьӧмъяс да содтӧдъяс аслас кольӧм вося кывкӧртӧдӧ, кӧні висьтавсис ӧткымын удж вӧчӧмысь вот перйӧм йылысь. Торйӧн кӧ, сикт-посёлокӧ ветлысь-мунысьӧс новлӧдлӧмысь.
2007 воын сідз шусяна базӧвӧй доходыс быд автобусысь вӧлі 6.000 шайт. Йӧзӧс нуысь-вайысьяслы вотсӧ коліс мынтыны 2.397-сянь 2.663 шайтӧдз — автобуслӧн ыджда сертиыс.
Тавося январь 1 лунсянь салонса быд местаысь базӧвӧй доходсӧ арталісны 1.500 шайт. Ӧти автобус вылӧ вотыс кайис 12.412-сянь 19.701 шайтӧдз. Ичӧт машинаясӧн вӧдитчӧмысь вотсӧ кутісны перйыны 5,2, а гырысьясысь 7,4 пӧв унджык. Сэк, кор муніс торъя маршрутъясӧд йӧзӧс новлӧдлысьяслӧн конкурс, вӧлі шуӧма, мый налы быть колӧ кутны и сідз шусяна резервын автобусъяс, кодъясысь перйыссьӧ жӧ вотыс. Сідзкӧ, сы серти, уна-ӧ кӧзяиныслӧн автобусыс, и содӧ налогыс. Кодлӧнкӧ кык-куим пӧв.
Районын ветлысь-мунысьӧс ӧні новлӧдлӧны Иван Васильевич Ракин, Евдокия Ивановна Ракина, Светлана Ивановна Лукина. Кор найӧ вайисны январь-мартысь декларацияяс, налогӧвӧй службаын уджалысьяс казялісны, мый сы мында кӧ содтыны вотсӧ, асшӧр предпринимательяс вермасны, кыдз шуласны, «кольны гачтӧгныс». Ӧд налы быть ковмас кыпӧдны билет донъяс, а «дона» автобусъясад пассажиръяс ӧдвакӧ кутасны пуксьыны.
Райсӧветса депутатъяс, торйӧн кӧ, Виктор Васильевич Саталкин, Николай Александрович Лютоев, районса администрацияысь юралысьӧс вежысь Сергей Валерьевич Иванушкин пасйисны, мый йӧзӧс транспортӧн новлӧдлӧмыс бӧръя кадас бурмыштіс, и некыдз оз позь конъявны кок йылас сӧмын на сувтысьяссӧ. Бюджеттӧ на тшӧт весьтӧ он тырт. Мӧдарӧ, колӧ отсавны лӧсьӧдны ветлысь-мунысьӧс нуан-ваянногсӧ, сетны позянлун ӧтувтчыны предпринимательяслы.
Райсӧветлӧн апрельса сессия вылын депутатъяс шуисны выль ног перйыны йӧзӧс новлӧдлӧмысь чӧжӧсысь ӧтувъя вотсӧ. Та дырйи кутасны артавны оз автобусъяссӧ, а пукалан местаяссӧ. Сідз, 18 местаысь быд квартал ковмас мынтыны 3.448 шайт, 18-сянь 25-местаӧдз — 3.625 шайт. Тайӧ кольӧм воын серти абу ёна уна. А воддза арталӧмнас кӧ урчитісны вотъяссӧ, автобусӧн йӧзӧс новлӧдлысьяс и збыльысь вермисны «кольны гачтӧгныс».
