ВЫН-ЭБӦС ДА ВӦЛЯ ПЕСӦМӦН
Водзті январь, февраль да март лыддьыссьылісны вӧрын уджалан ударнӧй тӧлысьясӧн. Спортын тайӧ кадколастыс сідзжӧ медся кивыв рекордъяс шедӧдӧм вылӧ. Кӧть эськӧ мортыс кӧ збыльысь спортсмен, сылӧн пӧсь кадыс — во гӧгӧр чӧж. И ордйысьӧмъясӧн озыр медводдза кварталыс — аслыссяма экзамен быд лунъя тренировкаяслы, спортзалын, лыжня вылын вын-эбӧс да вӧля помся песӧмлы.
Кулӧмдін районса сӧветысь депутатъяс вынсьӧдісны «2008-ӧд воын спорт» торъя уджтас да вичмӧдісны сійӧс збыльмӧдӧм могысь 1,5 миллион шайт. Сы лыдысь 970 сюрс шайтсӧ ДЮФКП-са тренеръяс да спорт учреждениеясӧн веськӧдлысьяс корисны районын ордйысьӧмъяс котыртӧм да командаясӧс мукӧдлаӧ венласьны мӧдӧдӧм вылӧ. Январь-мартын та могысь вӧлі торйӧдӧма кольӧм воын серти тӧдчымӧн унджык сьӧм.
Кыдзи пӧртсис олӧмӧ спорт сӧвмӧдан уджтасыс тайӧ куим тӧлысьнас? Кыдзи петкӧдчисны Эжва йывса спортсменъяс районса да республикаса ордйысьӧмъясын? Лызьӧн котралӧм, волейбол, баскетбол, мини-футбол, пызанвывса теннис кузя районса 20 да республикаса 5 ордйысьӧмын «Челядьлӧн да том йӧзлӧн физическӧй дасьлун клуб» МОУ-ысь петкӧдчис 1.417 морт. Мини-футболын, лызьӧн котралӧмын, баскетболын том спортсменъяс венласисны Интаын, Сыктывкарын, Ухтаын да Печораын. Мини-футбол да баскетбол кузя республикаса первенствоясын 12 район пӧвстын кулӧмдінсаяс босьтісны 5-ӧд да 2-ӧд местаяс. Лызьӧн котралӧм кузя Комилӧн первенствоын 12 район пӧвстын жӧ эжва йывсаяс вӧліны витӧдӧн. Шӧр да ичӧт арлыдаяс пӧвстын Пожӧгысь Сергей Попов да Помӧсдінысь Кристина Пыстина лоисны мӧдъясӧн.
— Таво вылӧ торйӧдӧм сьӧмысь 60 прӧчентсӧ ми сетім ДЮФКП-ын челядькӧд удж нуӧдӧм вылӧ, — висьталӧ районса администрацияысь физкультура, спорт да туризм юкӧнӧн веськӧдлысь И. Е. Тарабукин. — Быдмысь войтырӧс колӧ ёнджыка кыскыны спортӧ, сетны налы позянлун петкӧдлыны вын-сямсӧ оз сӧмын районын, но и республикалӧн тшупӧдын.
Верстьӧяс пӧвстын январь-апрельын вӧлі 11 ордйысьӧм. Лыйсьыны, котравны лызьӧн, лэптавны гира да штанга командаяс ветлісны Сыктывкарӧ да Ухтаӧ. Петкӧдчисны шӧркодя, босьтісны коймӧдсянь сизимӧд местаяс. Бурджыкӧсь вермӧмъясыс торйӧн петкӧдчӧмын. Кулӧмдінысь Евгений Уляшев лоис медводдзаӧн Комилӧн спартакиадаын да шедӧдіс спортса мастер ним.
Республикаса спартакиада вылын жӧ пауэрлифтингын медводдза местаясӧ жӧ петісны Паспомысь Евгений Сергеев да юрсиктысь Михаил Липин. А лыжник-ветеранъяслӧн Россияса первенствоын, коді вӧлі февральын, призёръясӧн лоисны Кулӧмдінысь Фёдор Нестеров, Алексей Мишарин, Тамара Кондрашкина да Пожӧгысь Владимир Мингалёв.
— Районса администрация бӧръя кадас кутіс сетны ыджыдджык тӧдчанлун спорт да физкультура сӧвмӧдӧмлы, материальнӧй подув ёнмӧдӧмлы, — тӧдчӧдӧ И. Е. Тарабукин. — Быд ыджыд школаын эм спортзал, лызьӧн котралан югзьӧдӧм ордымыс квайт. Помӧсдінын да Носимын паськӧдчӧны лыжнӧй, а Кулӧмдінын — туристическӧй базаяс. Республикаса веськӧдлысьяскӧд сёрнитчӧма нин юрсиктын спорткомплекс да бассейн стрӧитӧм йылысь. Водзӧ паськалас и туризм. Районын ӧні 8 татшӧм ордым, но турист котыръяс тшӧкыда ветлӧны и республикаса да Россияса маршрутъясӧн. Колӧ пасйыны и сійӧс, мый «Пожӧма яг» турбаза спортивнӧй ордйысьӧмъяс да шойччӧг котыртӧмысь ӧтдор ачыс нажӧвитӧ сьӧм.
Апрельӧдз чукӧртӧм 200 сюрс шайтсӧ сійӧ веськӧдас туристъяслы паськӧм да спорт эмбур ньӧбӧм вылӧ.
