ВОДЗӦ ТУЙЫС — ГРЕЦИЯӦ

Ветеранъяс пӧвстын бур вермӧм шедӧдіс сьӧкыд атлетика кузя Россияса чемпионатын Кебанъёльса штангист Сергей Мезенцев. Ас кодь сьӧктаяс пиас сійӧ лоис медся вынаӧн да босьтіс зарни медаль.

Республикалысь чесьтсӧ дорйыны Тольяттиӧ ветліс 6 спортсмен, Эжва йылысь Сергей вӧлі ӧтнас. Ордйысьӧмыс муніс март помын, чукӧртчылісны странаса 40 регионысь командаяс. Мезенцев кодь сьӧктааыс вӧлі 6 морт. Чемпионатын вермысьясысь котыртчис сборнӧй, коді ветлас Чехияӧ мирса татшӧм жӧ ордйысьӧм вылӧ. Жаль, Сергей эз вевъяв чукӧртны документъяссӧ.

Кольӧм вося ноябрын Тольяттиын сійӧ лоис Россияса кубок вӧсна вермасьӧмын чемпионӧн, вӧзйылісны путёвка Австрияӧ. Но ветлынысӧ эз жӧ вермы. Сьӧмнас некод эз отсав. Тольяттиӧдз ветлӧмсьыс да бӧр локтӧмсьыс рӧскодсӧ вештісны Сыктывкарса администрация, «Тепловодоканал» ООО-лӧн районса юкӧн да Кулӧмдін районса администрация. А суйӧр саяд ветлыны сьӧмыс колӧ ёна унджык. Сентябрь 24 — октябрь 6 лунъясӧ Грецияса Кефалония ді вылын Аргостоли карын Россияса сборнӧй, кытчӧ пырӧ и Сергей Мезенцев, бара кутас ордйысьны мирса чемпионатын. Став документсӧ колӧ дасьтыны майӧдз. Кытысь сюрас колана мында сьӧмыс миян земляклы? Сергей кутӧ лача республикаса да районса, предприятие-организацияясса веськӧдлысьяс, асшӧр уджалысьяс вылӧ, ӧд мӧдӧдчӧ вермасьны ставнас Россия вӧсна.

Ыджыд спортӧ коми зон пырӧдчис Сыктывкарса 7-ӧд профтехучилищеын велӧдчигас на (тренернас вӧлі Александр Юдин). 1988 воын тыртіс нин СССР-са спортын мастерлысь норматив. Унаысь вермасис республикаса да Россияса медвына штангистъяслӧн ордйысьӧмъясын. Но, буракӧ, тӧдчӧ карсянь ылын олӧмыс да нималана морт тшӧкыда кольӧ казявтӧг. Примерысла ылӧ мунны оз ков, посёлокса спортзаллӧн уджалан кадыс оз лӧсяв да, Сергейлы штангасӧ лоӧ лэптавны... котельнӧйын, кӧні сійӧ ӧні уджалӧ.