МЕД ЫТВА ВИЧЧЫСЬТӦГ ЭЗ СУ
Мир туй вылӧ ӧні оз вермы петны ни ӧти сьӧкыд машина, оз кӧ ло районса юралысьӧн кырымалӧм торъя кабала. Та йылысь индӧд сетіс Кулӧмдін районса администрацияӧн веськӧдлысь Сергей Каплин.
Март 26 лунӧ вынсьӧдӧм постановлениеын эм и мукӧд ӧлӧдана пасйӧд, кодъяс инмӧны предприятие-организацияясӧн, овмӧдчӧминъясӧн веськӧдлысьяслы. Документыс тшӧктӧ лоны тыр дасьӧн тувсовъя ытва кежлӧ. Туйяс весалӧм-дӧзьӧритӧм кындзи колӧ кутны син улын юяс да ёльяс вомӧн вуджанінъяс, видзӧдны связь да электролинияяс бӧрся, весавны ойдланінысь лӧп-ёг, лӧсьӧдны би кусӧдан техника, тырмымӧн заптыны ломтас-мавтас, сёян-юан, мукӧд вузӧс, лекарство... Ӧти кывйӧн кӧ, медым ытва некодӧс виччысьтӧг эз су.
Райадминистрацияысь общественнӧй безопасносьт юкӧнлӧн юӧр серти, кольӧм во апрельын да майын ёна лымъяліс да зэрис. Эжва туліс кыкысь, йиыс сы вылын кутіс потласьны апрель 14 лунсянь, а апрель 19–24 лунъясӧ дзикӧдз вӧрзис. Став понтонсӧ вевъялісны мездыны апрель 8 лунӧдз, бӧр зэвтісны Немдінын май 21, Пожӧгын июнь 2, мукӧдлаын июнь 16 лунӧ. Эз ӧти кадӧ ло пуктӧмыс ва вежласьӧм понда. Вуджӧдчыны ковмис пыжӧн.
Вуджанінъяс кӧ вочасӧн лоины дасьӧсь, тайӧс эз позь шуны рӧспута дырйи жуглӧм туйяс йылысь. Сьӧкыд машинаяс, медсясӧ коммерсантъяслӧн, ветланінъяссӧ вайӧдлісны нинӧм абуӧдз. Шуам, Югыдъяг да Смолянка, Югыдъяг да Канава костын. Тайӧ кывкутана кадас 14-ысь кусліс би, 8-ысь радиосвязь. Канавакӧд йитӧдыс эз вӧв май 2-ӧдсянь май 21 лунӧдз. Ыпнитліс 15 пӧжар. Сӧмын лӧп-ёг да кос турун сотчанінӧ кусӧдчысьяс ветлісны кӧкъямысысь. Вӧлі и ыджыд неминуча. Ытва дырйи вӧйис ӧти морт Белоборскын.
Став тайӧ ускӧттьӧсӧ колӧ кутны тӧд вылын таво. Ылӧсалӧмӧн, районын Эжва воссяс апрель 22–27 лунъясӧ, йылыс кытсюрӧ восьса ӧні нин. Мукӧд воын серти ытваыс, тыдалӧ, лоӧ ыджыдджык, оз кӧ лымсӧ кынталӧмӧн лэдз. Ойдлыны вермасны Югыдъягысь, Смолянкаысь, Кекурысь, Вомынбӧжысь стрӧйбаяс. Сэсся петкӧдтӧг на видзьяс вылӧ коли 200 гӧгӧр тонна кӧрым. Веськӧдлысьяслӧн мог — вӧчны ставсӧ, мед эз ло йӧзкӧд неминуча, мед эз усь скӧт, эз тшык-жуглась эмбур да оборудование. Колӧ видзчысьны и висьӧмъясысь, оз позь торкавны санитарнӧй нормаяс.
Районса юралысь тшӧктіс котыртны ытваысь видзчысян комиссиясӧ быд сиктса овмӧдчӧминын. Неважӧн татчӧс администрациялӧн чукӧртчылігӧн видлалісны сикт-посёлокъяслысь да предприятие-организацияяслысь дасьлунсӧ. Кыдзи тыдовтчис, унатор на вӧчтӧм. Ӧткымын веськӧдлысь абу на весиг дасьтӧма ытва дырйи уджалан план. Гашкӧ, кывкутана могъяссӧ воддза моз кӧсйӧны лэдзны ас визув вылӧ? Но ӧд ойдӧм ваыд веськодьлунтӧ да идӧртӧмлунтӧ оз сайӧд.
