ГИЖНЫТӦ КОЛӦ ЖӦ КУЖНЫ

20 гӧгӧр том гижысь бара чукӧртчыласны «Парма гор» газет редакцияӧ.

Апрель 8–9 лунъясӧ тані мунас налӧн семинар. Районас гижны босьтчысьясӧс ӧтувтӧ «Эжва» литературнӧй котыр, кодлы подувсӧ кольӧм нэмса 50-ӧд вояс помын на пуктывліс райгазетса сэкся редактор Николай Пунегов. Велӧдчӧмыс эз вош весьшӧрӧ: газет быдтіс уна поэтӧс да писательӧс, на лыдын республикаын паськыда тӧдсаӧсь Виктор Напалков, Виталий Уляшев, Василий Лодыгин. Ассьыныс ним шедӧдісны и томджыкъяс: Александр Шебырев, Александр Лужиков, Эдуард Тимушев, Алёна Ельцова, Алёна Мальцева, Анастасия Шомысова да мукӧд. Ӧні литератураӧ повтӧг нин пырӧдчӧны Диана Расова, Алёна Мишарина, Яна Васильченкова, Артур Уляшев.

Кык лунся семинарыс, кодӧс редакциялы котыртны отсалӧны национальнӧй политика министерство да республикаса гижысьяслӧн котыр, мунас Кулӧмдінса да Сыктывкарса профессиональнӧй литераторъяслӧн веськӧдлӧм улын. Поэзияӧ да прозаӧ нырччысьяс оз сӧмын видлавны-донъявны ӧта-мӧдныслысь кывбур-висьтъяссӧ, но и петавласны лыддьысьысьяс водзӧ.