АБУ ӦТИ, А КЫК
Евлалия да Емилия — татшӧм аслыспӧлӧс мича нимъяс сетісны асланыс быдтасъяслы Югыдъягысь Паршуков гозъя.
Кольӧм во гожӧмнас Енмыс козьналіс найӧс звӧнниӧн. Василий Валентинович да Валентина Владимировна семья содӧмсӧ лыддьӧны ыджыд шудӧн, а нёльнан челядьыс выль чоюкъястӧгыс овны оз нин вермыны.
Кольӧм воын жӧ, но неуна водзджык, февральын, татшӧм шуд усис и Великопольеысь Валентина Васильевна Мартюшевалы да Андрей Валерьевич Кочановлы. Налӧн сідзжӧ чужис ӧтпырйӧ кык кага. Шуны кӧ, Александрлӧн да Дарьялӧн вӧльнӧй светас ӧтув петӧмыс мамнысӧ эз ёна шензьӧд. Дас во сайын больничаысь сійӧ воліс нин моздорас кык кагаӧс кутӧмӧн. Ӧні Алёша да Женя мужикъяс кодьӧсь нин.
Босьтны кӧ бӧръя куим восӧ, двӧйни чужтысьыс Эжва йылын вель уна чукӧрмас. 2005 воын Кекурысь Анна Семёновна Мироновалысь да Вячеслав Викторович Чукинлысь керкасӧ долыдмӧдісны пузчужӧм Павел да Семён, Иван да Илья лоисны лелькуйтанторъясӧн Дереваннӧйысь Екатерина Александровна Каневалы. 2006 воын ӧти лунӧ чужӧм кык шӧвктугйӧн — Валерияӧн да Анастасияӧн — чолӧмалісны Керчомъяысь Людмила Ивановна да Андрей Иванович Лодыгинъясӧс. А Діасёръяысь Зухра Тагировна Насировалы да Александр Викторович Уляшевлы сиисны став бурсӧ Миланаӧс да Ульянаӧс быдтӧмын.
Таво двӧйниясыс Кулӧмдін районын эз на чужны. Но кыпӧдӧ ловтӧ, мый кага вайӧмыс вочасӧн содӧ. Кольӧм во Эжва йывса аньяс чужтісны 217 зонкаӧс да 176 нывкаӧс. Тавося январ-февральын загсын пасйисны нин 64 пузчужӧмаӧс. Медводдза кага лоис 29 семьяын, мӧд кага — 26-ын, 3-ӧд — 6 бать-мамлӧн да нёльӧд — 3 гозъялӧн.
— Демография вылӧ ёна тӧдчӧ обществолӧн талунъя олӧмыс, аскиӧ эскӧмыс, — висьталӧ Коми Республикаысь загс управлениелӧн Кулӧмдінса юкӧнын уджалысь Наталья Николаевна Багаева. — И сэк жӧ, кутшӧм нӧ общество семьятӧг? Йӧзыс гӧгӧрвоӧны, мый миян аскиа лунным — челядьын, да и государство бӧръя кадас кутіс сетны кага быдтысьяслы унджык кокньӧд.
Тайӧ кывъяссӧ позьӧ вынсьӧдны лыдпасъясӧн. 2006 воын районын чужис 361 кага да кувсис 599 морт. Кольӧм во чужысьыс — 393 нин, а кулысьыс 427. Воддза воас ӧтлаасисны 143 да юксисны 64 гозъя, кольӧмас чужис 199 семья да торйӧдчисны 60 гозъя. А таво, колӧкӧ, серпасыс нӧшта бурмас. Ӧд кык да унджык кага вайӧмсьыд миянӧс сӧмын ошкӧны, а оз Китайын моз мыждыны.
