ЭМ КӦ НЯНЬ — ОЛӦМ ШАНЬ
Рача шаньга да сӧчӧн, пувъя пирӧг да черинянь — став тайӧ чӧскыдторсьыс, позьӧ шуны, пызаныс чегис. Коми национальнӧй пӧжасъясысь ӧтдор тані вӧлі и ӧніяджык кадся вӧлӧга: торт, кекс, хворост... И, дерт жӧ, тупӧся нянь, кодлы медсясӧ и вӧлі сиӧма Кулӧмдінын медводдзаысь на нуӧдӧм татшӧм выставка-конкурссӧ.
— Видзӧдлӧй, кутшӧм сӧмын вузӧс огӧ кужӧй лэдзны асьным. Карысь вайӧм дорсьыд сійӧ весиг бурджык на, — тӧдчӧдіс пӧжасьысьясӧс, жюриӧс, уна лыда ньӧбасьысьӧс чолӧмалігӧн районса администрацияӧн юралысьӧс вежысь Лидия Николаевна Колесникова. — Няньыд — быд лунъя медся коланатор, и мед эськӧ йӧзыслӧн некор эз вӧв сы кузя сьӧкыдлун. Мед лавка джаджъяс «нюмъялісны» да быдӧн вермис бӧрйыны аслыс лӧсялана да донтӧмджык пӧжас.
Донъяс йывсьыс казьтыштӧмыс абу весьшӧрӧ. Найӧ со ӧні бара на содісны. Прӧдукция вӧчысьлы лоӧ содтӧд вештысьны пызьысь, няньшомӧ сорасъясысь, транспортысь. Нянь рынок вылын ыджыдъясыс абу йӧйӧсь: кӧть кутшӧм дон он пукты тайӧ вӧлӧга вылас, быть ньӧбасны. Со и колӧ быд ногыс ышӧдны ас производительясӧс. Дерт, водзті моз некод нин оз уськӧдчы быдтыны войвыв му вылын сю, шобді, рудзӧг, ид, но серпассӧ позьӧ вежны йӧзлысь корӧмъяс тӧд вылын кутӧмӧн, конкуренция сӧвмӧдӧмӧн, бур тӧвар вӧчысьяслы отсалӧмӧн. И район да республика тшупӧдъясын ӧнія кодь конкурсъяссӧ нуӧдӧмыс — зэв бур мӧвп.
Тайӧ пӧрйӧ ассьыс вӧчӧмторсӧ районса культура керкаын петкӧдліс конкурсӧ вит пырӧдчысь. Жюри, кӧні вӧліны райадминистрацияын, уджӧн могмӧдан шӧринын, предпринимательяслӧн координационнӧй сӧветын да мукӧдлаын зільысьяс, донъяліс пӧжасъяссӧ нёль номинацияын. Веськыда кӧ, тайӧс вӧчнысӧ вӧлі сьӧкыд, сэтшӧм уна да бур вӧлі вузӧсыс. Шуам, Кулӧмдінса нянь завод вӧзйис 29 сикас пӧжас, и вузасьысьяс Вера Владимировна Яковлева да Светлана Францевна Попова висьталісны, мый тайӧ предприятиелӧн абу на став ассортиментыс. Сідзжӧ жюрилы дыр ковмис бӧрйысьны Зимстанысь «Мария» ТПП ООО-лӧн, Кебанъёльысь «Зубко» ИП-лӧн, Кулӧмдінысь сельполӧн, «ТОХ» ООО-лӧн пызанъяс дорын. Конкурс нуӧдысьяс шуисны, мый медводдзаысьтӧ местаяс юклыны оз кутны, но быдӧнӧс пасъясны торъя номинацияын.
А сэк кості ордйысьысьяс тыр ӧдӧн вузасисны. Кӧть и выставка йывсьыс юӧрыс абу ёна паськалӧма, ньӧбасьысьыс вӧлі уна, и некод куш киӧн эз пет. Сідз, юрсиктса олысь Леонид Михайлович Попов тыра пакетъяс киас нуигмоз нюм сорӧн шуис, сэсся пӧ лавкаӧ вежон чӧж позяс не ветлыны. А пенсионерка Доминика Николаевна Попова, коді гортса пӧжасъяснас нималӧ сикт пасьта, эз сӧмын окотапырысь ньӧб татчӧс вӧзъянторъяссӧ, но и водзӧс пыдди тӧдмӧдіс аслас рецептъясӧн.
— Миян котырын, — висьталіс Кебанъёльса пӧжасянінӧн веськӧдлысь Нина Ивановна Зубко, — уджалӧ 5 морт, ставныс ыджыд сяма специалистъяс. Няньысь кындзи лэдзам уна мукӧд юмов вӧчӧмтор. Видлам ӧти рецепт, да бура кӧ инасяс, пӧжассӧ нуам ог сӧмын асланым лавкаӧ, но и мукӧдлаӧ. Некымын сикас нянь мӧдӧдам 26-ӧд номера профтехучилищеӧ, посёлокса лавкаясӧ, а сідзжӧ Кулӧмдінӧ да Кужбаӧ.
Нянь нимӧдан луныс помасис пӧшти став вузӧссӧ иналӧмӧн да предприятиеясӧн веськӧдлысьяскӧд семинар котыртлӧмӧн. Пасъям, сійӧс нуӧдісны ичӧт предпринимательство районын сӧвмӧдан торъя уджтас серти, кодӧс вынсьӧдіс юралысь Сергей Петрович Каплин. Водзмӧстчисны таын райадминистрацияысь экономика юкӧн, йӧзӧс уджӧн могмӧдан шӧрин, ичӧт бизнес сӧвмӧдӧм кузя координационнӧй сӧвет.
