МЕД ЙӦЗЫС ЭЗДЖЫК НЁРПАВНЫ
Немдінса участкӧвӧй больничаын уджалысьяслӧн видзӧдлас улын 1.082 морт, на лыдын 234 том морт да челядь. Та мында йӧзӧс могмӧдігӧн участокса бурдӧдчанін, Парчса да Лебежнӧйса ФАП-яс зільӧны уджсӧ пуктыны сідз, мед тыр-бур отсӧг вичмис став арлыдаыслы. Кыдзи висьталӧ главнӧй врач А. А. Игнатова, налӧн 16 морта котырлы тайӧ вынъяс серти.
— Колӧны сӧмын педиатр да терапевт, а сідзсӧ став уджалысьыс тырмӧ, — шуӧ Анастасия Андреевна. — Оланіныс миян эм, мед сӧмын локтасны. Ӧні уджавны тані майбыр. Кольӧм воын на дзоньталім 1992 воын стрӧитлӧм бурдӧдчанінсӧ. Нацпроект серти воис выль аппаратура. Дзоньталім и ФАП-яс. Колӧ шуны, фельдшерско-акушерскӧй пунктъяссӧ став колананас могмӧдӧны весиг миянысь бурджыка.
Веськӧдлысьлӧн кывъяс серти, уджъёртъяс вылас сылӧн зэв ыджыд лача, зільӧны сьӧлӧмсяньыс, висьысьяслысь быд корӧм пыдди пуктӧмӧн. А ӧд нёрпалысьясыд — челядь кӧть олӧма йӧз — аслыспӧлӧс этшаӧсь, ставныс дорӧ колӧ кужны матыстчыны, шаня сёрнитны, стӧча индыны бурдӧдчанторъяс. 40 во нин кылӧ йӧзсяньыс аттьӧ медсестра В. П. Беллон. Мелі кияссьыс, сибыд сёрнисьыс, ыджыд сямсьыс. Вӧчӧ кӧ укол, писти, пуктӧ капельнича, он весиг кывлы чуткӧмсӧ. Доймӧминад Валентина Петровна инмӧдчас да, быттьӧ эз и вӧвлы юкалӧмыд. Татшӧм жӧ небыдик да ышӧдана кыввора главнӧй врачӧс вежысь акушерка Лина Ивановна Шешукова. Корсюрӧ нӧбасьысь аньяс дорӧдз ковмылӧ ветлыны гортӧдзныс — оз на тай ставныс ас кадӧ волыны больничаад. Сетас сӧвет, гижас рецепт, кодӧс колӧ, мӧдӧдас Кулӧмдінӧ, чужтыны кӧ — Сыктывкарӧ. Лоӧ и аслыс колльӧдны. Уна бур кыв висьталӧны йӧзыс и участкӧвӧй медсестра Надежда Григорьевна Булышева йылысь. Парчын, Лебежнӧйын сійӧ важӧн ас морт, кӧть и ачыс Немдінысь. Дерт, сы дорӧ Немдінын моз луннас оз волы 20–26 мортыд, но ӧтнадлы абу жӧ кокни могмӧдны сы ыджда участоктӧ. Транспорттӧгыд да. Век жӧ сяммӧ тай, став висьысь дорас вевъялӧ, дзоньвидзалуннысӧ видзны йӧзсӧ тшӧтш ышӧдӧ.
Неважӧн участкӧвӧй больничаӧ локтіс челядьлӧн фельдшер Лидия Николаевна Бабина. Пыр и сӧльнитчис коллективӧ, быттьӧ тані абу нин ӧти во. Том специалист сибалӧ йӧз дорас, ветлӧдлӧ кагаясӧс видлавны кыдзи патронажнӧй сестра.
Во-мӧд сайын муніс сёрни пинь бурдӧдан жыр тупкӧм йылысь. Ӧні серпасыс вежсис. Врач-стоматолог Олег Николаевич Чувьюров бурдӧдӧ-нетшкӧ пиньяс, а гӧтырыс Зарема Александровна пукталӧ оз сӧмын Немдінса олысьяслы, но и лебежнӧйсаяслы, парчсаяслы, смолянкасаяслы, белоборсксаяслы, мыссаяслы. Тайӧ сикт-посёлокъясас стоматологыс абу. И йӧзыс волӧны участкӧвӧй больничаӧ. А вежоннас ӧтчыд пинь бурдӧдысь ачыс ветлӧ Югыдъягӧ.
Мария Ильинична Комарова видзӧдӧ оз сӧмын школаын челядьлӧн дзоньвидзалун бӧрся, но и ӧти сайын веськӧдлӧ лабораторияӧн. Ӧні кутшӧмсюрӧ анализ позьӧ сдайтны юрсиктӧ лэччывтӧг.
— Февральнас приём вылӧ воліс 400 сайӧ морт, — пасйисны бурдӧдысьяс, кор аддзысьлі накӧд. — Висьысьяс дорӧ ветлӧмысь ӧтдор, гортӧдзныс жӧ волӧмӧн, вӧчалім писти гепатитысь (виж висьӧмысь), корйысь, краснухаысь. Нацпроект серти кольӧм во и таво нуӧдім диспансеризация. Дон босьттӧг. Таво видлалім 84 мортӧс. Мартын диспансеризация мунӧ челядьлы. Колӧ содтыны, мый торъя видзӧдлас улынӧсь войнаса, йӧзӧдлытӧм тышъясса, Афганистанса ветеранъяс, Чернобыльӧ ветлысьяс. Найӧ абу унаӧн, оз няргыны, но кварталнас ӧтчыд медсестра тайӧ войтырсӧ быть нин видлалӧ.
Кыдзи тӧдчӧдӧ главврач, сиктын да ФАП-яс улӧ пырысь участокъясын йӧзыс медсясӧ нёрпалӧны остеохондрозӧн, давленньӧӧн, язваӧн, пыкӧсъясӧн, сьӧлӧм висьӧмӧн. Гоз-мӧд морт кӧвъялӧмаӧсь сифилис, гонорея, трихомоноз. Уналӧн, торйӧн нин дзескыдінысь воӧмаяслӧн, туберкулёз, да нӧшта паськӧдӧны на лэдзчысьӧм вӧснаыс. Сэсся бӧръя кадас унаӧн жӧ ас вӧлясьыс эновтӧны олӧмсӧ: ӧшӧдчӧны, лыйсьӧны, вундалӧны сӧнъяссӧ. Тайӧ, Анастасия Андреевна серти, сы вӧсна, мый йӧзыс оз аддзыны аскиа лунсӧ, сьӧкыд здукъясӧ налы оз отсавны рӧдвужыс да матыссаясыс. Кокньӧдсӧ аддзӧны сулеяысь. Юӧны садьсӧ воштытӧдз, а сэсся вӧчӧны олӧмас бӧръя воськов.
А юысьясӧс больничаын бурдӧдӧны жӧ. И мый тӧдчана, оз юрсиктын моз дон босьтӧмӧн. Колана лекарствояс, капельничаяс сетӧ бурдӧдчанін (тані эм аптека), вайӧны и асьныс.
Водзті лекарствонас могмӧдлісны Кулӧмдінсянь Югыдъягса больнича пыр. Ӧні ставсӧ ньӧбӧны ас сьӧм вылӧ. Дерт, быд колана таблетка, укол, зелльӧ оз сюр, но зільӧны корсьны, весиг йӧзлӧн корӧм серти. Вежоннас некымынысь лэччывлӧ юрсиктӧ аслас важиник УАЗ-нас шопер Фёдор Степанович Мамонтов. Коркӧ нуӧ висьысьясӧс, коркӧ лекарствоясла (ӧти сайын пасъям, машинасӧ шопер выль пӧв тэчис рамасяньыс).
Олӧмыд лунысь-лун чужтӧ выль корӧмъяс. И сыын, мый коллектив кужӧмӧн корсьӧ петан туйяс, ыджыд пайыс Анастасия Андреевна Игнатовалӧн. Ачыс сійӧ вой кӧть лун, зэр кӧть слӧт, медикамент тыра сумкаӧн тэрмасьӧ нёрпалысь дорӧ. Но и кӧзяйственнӧй уджъяссӧ оз личӧд. Бурдӧдчанінӧ воӧ ва, шоныд, тырмымӧн заптӧма пес. Ковмас кӧ мыйкӧ дзоньтавны, босьтчӧны ӧтув. Быдлаын тӧдчӧ веськӧдлысьлӧн водзмӧстчӧмыс. Та дорӧ пасъям, мый Немдінса бурдӧдчанін пырӧ районса вит медбур участкӧвӧй больнича лыдӧ.
