ЙИ ВЫЛӦ — ШАТИНӦН ДА ГУДӦКӦН

Кулӧмдін районын чери кыйысьяслӧн нёльӧд конкурс таво мунас март 22 лунӧ. Сійӧс лоӧ сиӧма Эдуард Тимушевлы.

Поэт, прозаик, журналист, Россияса гижысьяслӧн да журналистъяслӧн котыръясӧ пырысь, сійӧ ёна радейтіс вӧр-ва, висис сьӧлӧмнас парма-мамлӧн аскиа лун вӧсна. Торйӧн уна гижӧд сиис Кадам тылы, кодкӧд эз торйӧдчыв челядь дырйиыс и верстьӧ кадас.

Эдуард Алексеевич вӧлі инас ӧшйывтӧм, пыр корсис олӧмсьыс кутшӧмкӧ выльтор, зілис шензьӧдны йӧзсӧ аслас воськовъясӧн. Буретш сылӧн водзмӧстчӧмӧн куим во дорвыв муніс йипод улысь кыйсьысьяслӧн районса ордйысьӧм. Кужис тай ышӧдны-котыртны вуграсьысьяссӧ. Кулӧмдінын, Керчомъяын, Мысын йи вылас йӧзыс оз вӧлі тӧрны.

Жаль, водз муніс олӧмсьыс тайӧ енбиа мортыс. Но сылысь панӧмторсӧ водзӧ нуӧдӧны ёртъясыс, дженьыд, но яръюгыд оланногсӧ да творчествосӧ пыдди пуктысьясыс.

Конкурс нуӧдысь котыр, кытчӧ пырисны «Комирыбводлӧн» районса юкӧнын, вӧр-ва видзан райкомитетын, Лунвыв электрическӧй сетьяслӧн татчӧс юкӧнын да мукӧдлаын уджалысьяс, чуксалӧны оз сӧмын Эжва йывса, но и мукӧд районысь да карысь вуграсьысьясӧс поэтлӧн пыр кадся кыйсянінас — Кадамӧ. Мед петкӧдласны сэні сямсӧ да удаллунсӧ. Керчомъя сиктса администрация кӧсйысис отсавны места вылӧдз да бӧр вайӧм-нуӧмӧн, йи вылын аслыссяма праздник котыртӧмӧн.

Ыджыд Кадамӧдз 6 час асывсянь кутасны новлӧдлыны «Буранъясӧн». Чукӧртчаніныс — «Прупт» ООО-лӧн улыс склад.