СЭССЯ ВОДЗӦ ПОМӦСДІН ПЫР УХТАЛАНЬ
Кулӧмдінӧ воис волоконно-оптическӧй йитӧд. Тайӧ тӧдчана лоӧмторсӧ март 12 лунӧ пасйисны юрсиктса культура керкаын.
Праздник йылысь юӧрыс ӧдйӧ паськаліс водзвыв ӧшлӧм чуксалана гижӧдъясысь, улич кузя ветлысь торъя машиналӧн радиоысь. Та вӧсна йӧзыс вӧлі тыр.
Гажсӧ нуӧдысьыс — «Рытыв-Войвыв Телеком» ВАК-лӧн Коми филиал — медводз котыртіс связьлысь талунъя услугаяс петкӧдлӧм да вузавлӧм. Вӧзйисны услугаяссӧ «Уральский GSM «Мегафон» да «Теле–2 Коми» пӧдса акционер котыръяс. Веськыда тані позис пыравны ӧтуввезйӧ, вуджӧдны ассьыд мобильнӧй телефонтӧ донтӧмджык тариф вылӧ да с.в. А сэсся вӧлі кыпыд концерт. Кулӧмдінсаясӧс гажӧдісны Сыктыв районса Визинысь «Девчата» да орчча районысь «Корткеросские бабки» котыръяс. Гажыс помасис яръюгыд фейерверкӧн.
Кыдзи висьталіс «Рытыв-Войвыв Телеком» восьса акционер котырлӧн регионса филиалысь сӧветник Алексей Цыпанов, 360 километра волоконно-оптическӧй линияыс республикаын медводз йитіс Сыктывкарӧс да Ухтаӧс. Тайӧ вӧлі 1998 воын. Ӧні Комиын сійӧ паськаліс 1,5 сюрс километр ылнаӧ. Выль технология пыртӧмыс отсаліс бурмӧдны йитӧдсӧ Эжва йывса 20 сикт-посёлокын. Ӧні лои позянлун «кыйны» телевидениелысь 100 сайӧ программа, вӧдитчыны уна сюрс выль номера телефонъясӧн. Но талун линияыс уджалӧ оз на тыр вынӧн. Вочасӧн ёна на содасны позянлунъясыс. Кабельыс водзӧ кутас нюжавны Помӧсдін пыр Ухталань.
Районса администрацияӧн юралысь Сергей Каплинлӧн кывъяс серти, ӧні Эжва йывса войтыр оз нин вермыны шуны, мый олӧны гуын моз. Неважӧн на районным республикаын медводз йитчис 110 вольта энергетическӧй кытшӧ. Биыс ӧні оз нин куслась. А выль сикас связь пыртӧмыс нӧшта нин ёнмӧдӧ аскиа лунӧ эскӧмсӧ. Кодкӧ чайтліс-ӧ, мый и миянын, гырысь каръяс костын моз позяс нуӧдны сідз шусяна телепосъяс. Ӧні жӧ Кулӧмдінсянь позьӧ сёрнитны син на син Сыктывкаркӧд и Косланкӧд, Кӧрткерӧскӧд и Мылдінкӧд. «Рытыв-Войвыв Телекомлӧн» зільӧмӧн Кулӧмдінсянь сотӧвӧй йитӧд позьӧ кутны ӧтпырйӧ куим оператор пыр. «Мегафонысь», МТС-ысь да «Теле2-ысь» ӧтдор районӧ вӧзйысьӧны нин «Билайн» да мукӧд нималана котыр.
Районса юралысь пӧся аттьӧаліс «Телекомса» веськӧдлысьясӧс, «ПМК–307»-ысь стрӧитчысьясӧс йӧзлы татшӧм ыджыд бур вӧчӧмысь да медся ёна водзмӧстчысьяслы сетіс почёт грамотаяс да ошкана письмӧяс.
А выль кабельыс, кыдзи казьтыштлім, оз «гӧрддзась» Кулӧмдінын. Зэр кӧть слӧт, нюръяс вомӧн и тшем парматі 1,5 метр муас сюйӧмӧн сійӧс водзӧ нуӧдасны Ухталань. Кывкутана да сьӧкыд уджсӧ вӧчигӧн связистъяс збыльмӧдӧны ӧти мог: йӧз костын топыд йитӧдъяс лӧсьӧдӧмӧн, став сикас юӧрлы «веськыд туй» сетӧмӧн отсавны водзӧ бурмӧдны йӧзлысь олӧмсӧ. Буретш татшӧм пас улын уджалӧ и ставнас «Рытыв-Войвыв Телеком» компания.
