ДЕРТ, КОВМАС ВЕЛӦДНЫ ЙӦЗСӦ

Вонас 750 сюрс кубометр дась тьӧс-плака кутас лэдзны вӧр пилитан завод, кодӧс кыпӧдасны Кебанъёль дорын. Пасъям, ставнас Кулӧмдін район кольӧм во гӧгрӧс вӧр вӧчӧмнас дыр мысти вӧлисти воӧдчис 1 миллион кубометрӧдз.

А выль предприятиеыс сы ыджда лыдпасӧдзыс воӧдчас сідз шусяна джуджыд переработкаӧн. Проектыслӧн учредительыс — «Центрозап» акционер котыр (Польшаса Катовицы карысь). Уджсӧ вӧчысьыс — «Центровудком» ООО. Майын стрӧитчӧмыс пансяс нин. Июньӧдз тырвыйӧ дасьтасны вӧр заптан, переработайтан да иналан планъяс.

Кыдзи шуис районӧ неважӧн волігас КР-ысь промышленносьтса да энергетикаса министр Н. Н. Герасимов, на подув вылын правительство кутас зільны, мед сюйны проектсӧ торъя тӧдчанлунаяс лыдӧ. Сэки позяс, шуам, вӧр босьтны аукционъястӧг, бӧрйысьны вӧзъян кварталъясын. 300 сайӧ миллиард шайта проектыс районлы зэв кивыв. Бюджетӧ воас содтӧд сьӧм, лоӧ 1.000 мортлы уджаланін. Тайӧ отсалас чинтыны уджтӧмалӧм, торйӧн нин, нывбабаяс пӧвстын. Рытыввылын татшӧм заводъясас 80 прӧчентыс — аньяс. Дерт, ковмас велӧдны йӧзсӧ.

Выль завод стрӧитӧм вылӧ Кулӧмдін районӧс бӧрйӧма абу сӧмын сы вӧсна, мый вӧрыс тані уна. Татчӧ эм асфальта туй, оз ков бокысь вайӧдны и уджалысьясӧс.