ПАТЕРАСӦ — ВӦЛЬДІН СИКТЫН ОЛЫСЬЛЫ

Сыктывкарысь патера, кодӧс пудъялісны став республика пасьта март 2 лунӧ бӧрйысигӧн сеталӧм календарьяс серти, усис Вӧльдін сиктса олысьлы.

А Ручса аньлы тайӧ жӧ календарьяс сертиыс воис «Нива» машина.

Кыдзи тӧдса, февраль 20–29 лунъясӧ миян республикаын муніс «Веськав дасӧ» акция. «Мыйла ме муна бӧрйысьны март 2 лунӧ?» пас улын сійӧс нуӧдісны «Доръям йӧзлысь правояс» республикаса общественнӧй котыр, шӧр да ичӧт бизнес котыртан «Россиялӧн мыджӧд» организациялӧн Коми Республикаса, а сідзжӧ Россияса промышленникъяслӧн да предпринимательяслӧн союзысь миян регионса юкӧнъяс.

Тайӧ жӧ акция сертиыс районын пудъялісны 20 сотӧвӧй телефон. Найӧ усины Кулӧмдінса, Кебанъёльса, Тымсерса, Югыдъягса, Ручса, Пожӧгса да Помӧсдінса олысьяслы. Бӧрйысьӧм бӧрын лоины тӧдсаӧсь и найӧ, кодъяслы воис телевизор. Татшӧм козиныс вӧлі 44, вичмис быд бӧрйысян участокӧ волысьясысь ӧтилы.

Пасъям, Кулӧмдін район гӧлӧсуйтысьяслӧн лыд сертиыс республикаын медбуръясысь ӧти. Сэтшӧм сиктъясын, кыдзи Аныб да Мыс, участокъясӧ волӧмаӧсь муртса абу 100 прӧчент бӧрйысьысьыс. Дерт, козинъясыд ышӧдісны жӧ, но кызвын войтырыс волісны медвойдӧр бӧрйысьны.