А ЙӦЗЫС КЫТЧӦ ВОШТЫСЯСНЫ?
Ӧні «Немлес» ООО-ын ки помысь пӧрӧдчӧ сӧмын кык бригада. Мартын и найӧ оз лоны. А водзті, кольӧм нэмса 80–90-ӧд воясын, ӧтнас ичӧтик Белоборск посёлок мӧдӧдліс 2 мастерскӧй участоклӧн делянкаясӧ 5–6 бригадаӧн. Пӧрӧдчисны Югыдъягса да Смолянкаса векни кӧрт туйяс бердын, Зӧридз да Ын юяс сайын Югыдъягысь ки помысь трелёвочник отсӧгӧн заптысьысьяс, вӧлі и механизируйтӧм бригада.
Талун важ технология серти уджалысьяс эз кутны ковны тшӧтш и улыс складын. «Немскӧй-І» чинтасянінын февраль 19 лунӧдз чинтасис кык бригада, ӧні лои ӧти, и абу пыр кадся — аски-аскомысь и сійӧс вермасны бырӧдны, ӧд мыйта мортӧс нин кольӧм воын корисны мунны. Медсясӧ пенсия арлыдӧ матыстчысьясӧс.
Виктор Николаевич Наумовлӧн 8 морта коллектив — мукӧд бригадаысь чукӧртӧм йӧзысь. Ачыс бригадирыс вӧлі больничнӧй вылын, кор волім улыс складӧ. Вежис сійӧс том чинтасьысь Руслан Михайлович Мамонтов. Сы серти, вӧрыс воӧ бура, вайӧны лун и вой. Медсясӧ гожӧмнас да арнас пӧрӧдлӧм коз да пипу. Уджалӧны 7 асывсянь 3 час рытӧдз, вевъялӧны чинтавны 7–8 грузӧдз, кӧть и вӧрыс лёка увйӧма, няйт, ӧти грузсӧ вундалігӧн ковмылӧ 7 чеп.
Январын пӧ, шуис бригадирӧс вежысь, кыкнан коллективыс вӧчис кык план, ӧтиыс сетіс 3 сюрс 700 кубометр, мӧдыс муртса этшаджык. Но кӧсйысисны пӧ мынтыны 70 прӧчент премия, а сетісны сӧмын 40-сӧ. Мерайтчысь Анатолий Николаевич Матвеев, коді улыс складын 25 во, да сортировщик Олег Борисович Шешуков, коді лента вылын 15 во, пасйисны тайӧс жӧ. «Тимшерлесын» пӧ вӧчисны миянысь этшаджык, а нажӧвитӧмаӧсь кык пӧв унджык. Ӧбиднӧ, мый начальство ылӧдліс. Тайӧ кывъяс дорас сюртчисны и пучок кӧртавлысьяс Василий Александрович Мамонтов да Виталий Григорьевич Карманов. Мырсям-мырсям пӧ ӧтпырйӧ 2 эстакада вылын, кӧрталам 30 сайӧ пучокӧдз ӧти сменанас, а ышӧдӧмыс абу. Мӧдарӧ на, пыр шуӧны, мый талун-аски и налӧн уджыс вошас. Мастер Эльвира Вячеславовна Лодыгина мыйлакӧ сёрнитны эз кӧсйы, а старшӧй мастер Наталья Сергеевна Меленчук буретш вӧлі вӧрын, ковмис бӧрыннас шыӧдчывлыны предприятиеса нормировщик Евдокия Владимировна Булышева дорӧ. Сійӧ гӧгӧрвоӧдіс, мыйла вештысьӧмас лоис татшӧм гӧгӧрвотӧмторйыс. «Немлесын» дасьтӧмаӧсь став документсӧ, мед збыльысь мынтыны январын 70 прӧчент премия. Юӧртӧмаӧсь та йылысь механизаторъяслы, рабочӧйяслы, но дзик нин бӧръявылыс ЛПК-лӧн вӧр заптан юкӧнын шуӧмаӧсь, кабалаястӧ пӧ ог кырымалӧй.
Тыдалӧ, сэні оз нин ыджыд тӧдчанлун сетны важ технологияа уджыдлы. Ӧні пыр ёнджыка зільӧны босьтчыны Скандинавияса уджаланногӧ. Ӧні финн комплексыс вӧчӧ 5–6 бригада мында вӧр, татшӧм техникаӧн заптысьысьяс вӧсна и медыджыд тӧждыс. «Немлеслӧн» талун 3 комплекс. Регыд мысти пӧ лоӧ дас. Ӧні нин Немдінладорса пармаысь делянкаяс бердын чукӧрмӧма наӧн пӧрӧдӧм-чинталӧм сы мында вӧр, мый петкӧднысӧ оз вевъявны. Лун и вой эськӧ лэччӧдлӧны кражъяссӧ выльӧн лӧсьӧдӧм бӧрйысянінӧ, кӧні торйӧдалӧм да колана мындаӧн кӧртавлӧм бӧрын пыр жӧ нуӧны пурйӧн, но ва воссьытӧдз ставсӧ петкӧдны оз удитны. Вӧрыс тшыкас места вылас. Кольӧм воын кӧ предприятие мӧдӧдліс ЛПК-ӧ ю кузя 5 пур да катера 2 воз, таво, дерт, лоӧ унджык. Ӧні нин пӧшти дась нёль пур. Ылӧсалӧмӧн, ставсӧ пуръясӧ лоӧ сюйӧма матӧ 90 сюрс кубометр. Сэк жӧ — тайӧ заптӧмаыслӧн ичӧт юкӧн на. А машинаӧн лэччӧдлыны карӧдз вывті дона.
Таво, кыдзи и кольӧм воын, «Немлескӧд» сёрнитчӧмӧн пуръясӧ ассьыс вӧр ваялӧ тшӧтш «ИП В. В. Белый» асшӧр предприятие. Пуръясьысьясыс сылӧн уджалӧны лун и вой, шоперъяс вӧчӧны сменанас 5–6 рейсӧдз. Стропальщик Сергей Владимирович Кармановлӧн да шопер Александр Николаевич Никоновлӧн висьталӧм серти, налӧн овмӧсыс кӧсйӧ жӧ босьтны финн комплекссӧ. Водзӧ кӧ лоӧны бур йитӧдъяс «Немлескӧд», предприятиеыс вӧрнас тырас. Таво нин сёрнитчис 10 сюрс кубометр вылӧ.
«Монди Сыктывкарса ЛПК» улӧ пырысь вӧр овмӧсъяс да мукӧд заптысь кольӧм во районын воӧдчисны 1 миллион кубометрӧдз. Выль технология пыртӧмӧн, выль туйяс вӧчӧмӧн матысса кадӧ тайӧ лыдпассӧ шуӧма содтыны кык пӧв. И содас. «Монди СЛПК» ӧні, позьӧ шуны, шӧтӧ выль техникасӧ аслас предприятиеясӧ. Но майшӧдлӧ ӧтитор: куб да руб бӧрся вӧтлысигӧн эновтӧмаясӧн кольӧны вӧр овмӧсъясын уджалысьяс. Кытчӧ найӧ воштысясны? «Немлесын» кодь серпасыс ӧд и районса мукӧд предприятиеын.
