АРЛЫДА ЙӦЗ ВӦСНА ТӦЖДӦН
20 во сайын Кулӧмдін районса ветеранъяс шуисны ӧтувтчыны. Вывті нин уна тӧжд-мог майшӧдліс найӧс, а ӧткӧнтӧ мый верман вӧчны. Котыртісны ассьыныс райсӧвет, а сикт-посёлокын — первичнӧй организацияяс. Талун районын татшӧмыс 31, и лыдыс нӧшта на содӧ. Могыс налӧн ӧти — дорйыны ветеранъясӧс, отсавны венны вежласьысь олӧмас сьӧкыдлунъяссӧ.
Кольӧм вося сентябрь 1 лунсянь райсӧветӧн веськӧдлӧ Н. А. Лютоев (снимок вылын) вылын). Сійӧ — профессиональнӧй журналист, 27 во уджаліс газетъясын. Зэв бура тӧдӧ районсӧ, татчӧс йӧзсӧ, и сійӧс бура тӧдӧны. Та вӧсна ветеранъяс августын асланыс пленум вылын бӧрйисны Николай Александровичӧс асланыс организацияӧн юрнуӧдысьӧн. Мортыс, позьӧ шуны, юрнас суніс выль уджас, ӧні тӧдӧ нин сылысь гугсӧ и бансӧ. Ми шуим сёрнитыштны Николай Лютоевкӧд арлыда йӧзлӧн талунъя олӧм-вылӧм да ӧти сайын и райсӧветлӧн водзӧ вылӧ могъяс йылысь.
— Выль удж вылӧ локті да, чайті, мый кокни сійӧ, абу на газет вӧчӧмыд, но ӧні гӧгӧрвои: ветеранъяс — тайӧ сэтшӧм йӧз, кодъяс дорӧ колӧ торйӧн матыстчыны быдӧнлысь майшӧгсӧ кылӧмӧн. Районын 7 сюрс гӧгӧр пенсионер, на лыдын войнаса 48 участник. 481 морт 80 арӧсысь ыджыдджык. 25 мортлы — 90 сайӧ арӧс. А Немдінысь Ф. И. Беллон вуджис и 100 вося тшупӧд. Олӧма йӧзкӧд пыр колӧ аддзыны ӧти кыв, отсавны мыйӧн верман, ышӧдны быдторйын. Отсӧгас быть кыскыны мукӧд общественнӧй котырсӧ, районын уджалысь предприятие-учреждениеяссӧ, меставывса администрацияяс. Ӧти кывйӧн, ветеранъяс вӧсна тӧждысьны сідз жӧ, кыдзи и районса юралысь С. П. Каплин. Райсӧветкӧд топыд йитӧдъяс кутӧмӧн сійӧ ни ӧти шыӧдчӧм оз коль видлавтӧг, ачыс пыр ветеранъяс пӧвстын, ветлӧ весиг гортӧдзныс чолӧмавны юбилейӧн, сетны козин, сёрнитыштны восьсӧн.
— Николай Александрович, а ёна-ӧ тыдалӧ татшӧм тӧждыс меставывса администрацияяслӧн?
— Оз быдлаын. Торйӧн индавны ог кут, но шуа: эмӧсь на сэтшӧм сикт-посёлокъяс, кӧні быттьӧ вунӧдӧмаӧсь ветеранъяссӧ, а эмӧсь сэтшӧмъяс, кӧні найӧ торъя видзӧдлас улынӧсь. И сэн, кӧні администрацияяс топыд йитӧдын уджалӧны первичнӧй организацияяскӧд, олӧма йӧзсянь ни ӧти элясьӧм он кывлы. Мӧдарӧ на, сӧмын аттьӧалӧм.
Райадминистрацияса юралысь С. П. Каплин ӧні ветлӧдлӧ сикт-посёлокъясті, аддзысьлӧ да сёрнитӧ овмӧдчӧминъясӧн, предприятие-учреждениеясӧн веськӧдлысьяскӧд, общественнӧй олӧмын водзмӧстчысьяскӧд. Сыкӧд тшӧтш ӧкмыслаӧ ветлі и ме. Абу быдлаын ӧткодь серпасыс. Гӧля олӧны пӧрысь йӧз. Уналӧн пенсияыс весиг 3 сюрсыс абу, а ӧткымынлы и дзик оз во — воддза уджалӧмсӧ оз артавны да. Дзескӧдӧм эм и мукӧдторйын. Шуам, вель уна элясьӧм пес кузя. То сійӧс оз вайны, то вывті дона сувтӧ. Тешкодь серпас: сэн, кӧні эм вӧр, пескыс оз сюр. Зимстанын оз вичмӧдны весиг вӧрын вӧвлӧм уджалысьяслы. Тымсерын вайӧны керъяснас, асьныд пӧ, бабушъяс, пилитӧй. А Мысын кубыс 300 шайта, и вайӧны ӧшинь улӧдзыд. Парчын абу ва босьтан весиг ӧти скважина и струбаыс лыда. Эжваӧдз ӧмӧй лэччывлыны? Сэк жӧ Мысын 13 колонка, оз ков, майбыр, майшасьны.
Ёна шуасисны йӧзыс лекарствоӧн лёка могмӧдӧм вылӧ. Вочын весиг аптекаыс абу, Тымсерын сійӧс тупкисны. А кӧні эм аптекаыс, колана бурдӧдчанторйыс оз сюр.
Либӧ со нӧшта ӧти майшӧг. Олӧмаяс пиысь унаӧн видзӧны скӧт, шуам, кӧза, ыж. А турун заптыны ни вайны оз вермыны. Сиктса администрацияяслы колӧ корсьны позянлун да лӧсьӧдны ассьыныс техника, мед отсавны йӧзыслы, мед эз ков копрасьны коммерсантъяслы.
Сэсся туйяс оз весавны. Шуам, ковмас кӧ корны «тэрыб отсӧг», сійӧ сувтӧ километр ылнаӧ. Нӧшта ӧтчыд тӧдчӧда: кӧні уджалӧ ветеранъяслӧн первичнӧй организация, сэні майшӧгыс абуджык.
— Ми сӧмын сьӧкыдлунъяс йылысь сёрнитам, но ӧд лов кыпӧданаыс кӧнкӧ эм жӧ...
— Да, ветеранъяс ловнаныс оз усьны. Уналаын буретш найӧ культурнӧй олӧм кыпӧдысьясыс. Зіля пырӧдчӧны быд сикас гажас, асьныс тшӧтш котыртӧны. Помӧсдінын пуктӧны спектакльяс, Аныбын босьтчисны аэробикаӧ, Керчомъяын — гимнастикаӧ. Афганечьяслӧн союзкӧд нуӧдӧны и том йӧзкӧд патриотическӧй удж. Содта: миян районса сӧветын 24 депутат, на лыдын нёльыс — ветеран. Таво октябрын мӧвпалам нуӧдны ветеранъяслӧн хоръяслысь фестиваль. Кутасны сӧмын сьывны, но лоӧны и выставкаяс, конкурсъяс.
— Николай Александрович, сиам став олӧма йӧзыслы, ветеранъяслы дзоньвидзалун, быд бурас эскӧм да матыссаяссянь, ас войтырсянь ыджыдджык тӧжд да отсӧг.
— Аттьӧ.
