КАЗЬТЫЛІСНЫ ДА ОРДЙЫСИСНЫ
Немдінсаяс бара котыртлісны спортлы сиӧм ыджыд гаж. Сизимӧдысь нин. А нырщикъяснас вӧліны сиктса администрацияӧн веськӧдлысьяс да Р. Карманов нима школаын велӧдысьяс.
Буретш Немдін школаса ОБЖ да физкультура кузя вӧвлӧм велӧдысьяслы — Н. Чесноковлы да А. Овсяниковлы — и сиисны уна сикас ордйысьӧмсӧ. И эз сӧмын найӧ. Вын да пельклун петкӧдлыны волісны и Парчысь, Лебежнӧйысь, Шӧръягысь спорт радейтысьяс. А воддза воясас венласисны тшӧтш Мысса, Смолянкаса да весиг Кулӧмдінса том йӧз.
Став чукӧртчӧмаясӧс Айму дорйысьлӧн лунӧн чолӧмалігӧн сиктса юралысь И. Игнатов жальпырысь казьтыштіс, мый талунъя спортивнӧй гажас оз нин сюртчыны Анатолий Валентинович да Николай Александрович. Найӧ збыльысь сьӧлӧмнас висисны сиктын спорт сӧвмӧдӧм, дзоньвидза оласног лӧсьӧдӧм, Аймуӧс аски дорйысьясӧс дасьтӧм вӧсна. Сьӧлӧм нёрпалӧм пондаыс водз кувсисны. А. Овсяниковлы эз на тыр и 48 арӧс, а Н. Чесноков муртса воӧдчис 51-ӧдз. Ӧтиыс томуловӧс велӧдіс-воспитайтіс 24 во, мӧдыс 23. Котыртлісны да асьныс пырӧдчылісны став ордйысьӧмас, кодъяс мунісны сиктын, районын, республикаын. Тайӧ вӧліны шань да пыдди пуктана йӧз, ыджыд нима велӧдысьяс. Талунъя ордйысьӧмыс — налысь сӧстӧм паметьсӧ казьтылана пас жӧ.
Воссис ӧта-мӧд костын венласьӧмыс Ефим Кармановлӧн да Николай Игнатовлӧн гудӧкӧн да гитараӧн ворсӧмсянь. Военно-патриотическӧй шыладъяс чужтісны праздниклы лӧсялана ловкылӧм, ӧд гажыс муніс буретш Айму дорйысьлӧн лунӧ. Пӧся ордйысисны армияын служитлӧм нин и тайӧ могсӧ олӧмӧ пӧртігкежлӧ сӧмын на лӧсьӧдчысь том йӧз. Школаса спортзалын видзӧдысьыс вӧлі тыр. И со кывкӧртӧд вӧчан да награда сеталан здукъяс. Приза местаяс босьтысьяслы вичмисны сиктса администрациясянь дипломъяс да спонсоръяс Е. Чесноковасянь, Л. Игнатовсянь козинъяс. А медводдза местаяссӧ босьтісны пызанвывса теннисысь — Иван Карманов, шахматысь — Евгений Расов, «воздушкаӧн» лыйсьӧмысь — Алексей Карманов, киӧн вермасьӧмысь Алексей Шешуков, гира лэпталӧмысь Алексей Пименов, автомат разьӧм-тэчӧмысь Павел Напалков. Волейболысь воддза кык местасӧ юкисны велӧдысьяслӧн «Удальцы-молодцы» команда да сиктса «Люкс» сборнӧй. Тренеръяс А. Хайретдиновлы, В. Игнатовлы, В. Шешуковлы, дерт, любӧ вӧлі шедӧдӧм вермӧмъяссьыс.
* * *
Татшӧм жӧ ордйысьӧм шуисны котыртлыны аньяслӧн праздник лунӧ, март 28 лунӧ лоӧ А. Овсяниковлы сиӧм шахмат турнир.
А тайӧ ордйысьӧмсӧ видзӧдӧм бӧрын чужис кывкӧртӧд: оз на ставӧн миян сиктъясын весь овны да вина юны. Унджыкыс — дзоньвидза оласнога йӧз. Колӧ сӧмын кужӧмӧн ӧтувтны-ышӧдны найӧс.
