МЕД ЙӦЗСЯНЬ ЭЛЯСЬӦМ ЭЗ КЫВ
Кыдзи тӧвйис район, кутшӧм тырмытӧмторъяс жилищно-коммунальнӧй овмӧслӧн уджын да кыдзи найӧс бырӧдны — та йылысь сёрни муніс Кулӧмдін районса администрацияын. Тайӧ майшӧдлана юалӧмъяссӧ помся видлалӧны уна сикас сӧвещание, планёрка вылын. Овмӧссӧ, позьӧ шуны, меставывса власьт пыр кутӧ син улас. А ӧні сылысь уджсӧ донъялісны архитектура, стрӧитчӧм да коммунальнӧй овмӧс кузя министерствоысь, «Коми теплӧвӧй компания» ВАК-ысь, Комиысь жилищнӧй инспекцияса чина йӧз.
Районса администрацияӧн юралысьӧс вежысь Сергей Иванушкин медводз тӧдмӧдіс, кутшӧм серпасыс тайӧ юкӧнас. Районын оланіныс 669 сюрс квадратнӧй метр. Тӧв кежлӧ ЖКХ улӧ пырысь керкаяс дзоньталӧм-дасьтӧм вылӧ ас кӧштаысь видзӧма 21,6 миллион шайт. Вичмӧдісны вель уна сьӧм и республикаса да федеральнӧй бюджетъясысь. Кӧть и уджйӧзӧн, но тырмымӧн вайӧма ломтас районса котельнӧйясӧ. Ставыс сикт-посёлокын шоныд сетан 38 километр труба, сы лыдысь 13-ыс — «Тепловодоканаллӧн». Сылысь дзоньталісны жӧ, кӧть и этшаник — 250 метр. Районын оз тырмы юан ва, скважинаясын сійӧ тшӧкыда абу сӧстӧм, а выль ва башняяссӧ оз стрӧитны. Бӧръя кадас кыдзкӧ-мыйкӧ удайтчис сувтӧдны ва качайтан сідз шусяна частотнӧй регуляторъяс Озъягын, Немдінын, Лӧгинъягын.
Сергей Валерьевич висьталіс и сійӧс, мый ЖКХ-лысь уджсӧ ёна падмӧдӧ патераясысь да коммунальнӧй услугаясысь вештысьӧм кузя уджйӧз. Сійӧ артавсьӧ нин 4,600 миллион шайт. Сьӧмсӧ перйӧны эськӧ суд пыр, но этша. Йӧзыс ыстысьӧны, мый вештысьнысӧ нинӧмӧн, либӧ шуасьӧны коммунальнӧй услугаясӧн лёка могмӧдӧм вылӧ.
— Тіян районын эз вӧв некутшӧм гырысь неминуча да ускӧттьӧ, таысь аттьӧ службаныдлы, — вӧчис кывкӧртӧд районса объектъяс вылӧ волӧм бӧрын министрӧс вежысь Татьяна Замятина. — Но век жӧ уджаланныд омӧля, он водзмӧстчӧй. Сикт-посёлокъясын колӧ унатор на вӧчны найӧс югзьӧдӧм да уличаяс весалӧм могысь. Быть колӧ лӧсьӧдны пӧрадок и шоныд да ва сетӧм, уджйӧз бырӧдӧм, услугаясӧн лючки могмӧдӧм кузя.
Татьяна Егоровна висьталіс, мый тайӧ пӧрйӧ волігас пыраліс куим котельнӧйӧ. Ывлаыс вӧлі шоныд, а юрсиктса квартальнӧй ломтысянінын дугдывтӧг дубитісны-лӧдсалісны пачьяссӧ. Сэк жӧ Кебанъёльын ломтысьысьыс шоныдсӧ сетіс поводдя серти. Мыйла весьшӧрӧ ломтыны ывласӧ? Кулӧмдінын уна ӧтувъя керкаысь шоныдыс пышйӧ ортсӧ, вевтъяс вылын тӧв шӧрнас ӧшалӧны йинёньяс. Министрӧс вежысь кӧсйысис, мый кутасны отсавны районлы венны ЖКХ-са сьӧкыдлунъяс, но и мед места вылын оз надейтчыны кодкӧ вылӧ. Ӧтувъя уджӧ колӧ босьтчыны депутатъяслы, меставывса администрацияясын зільысьяслы, «Коми теплӧвӧй компанияса» специалистъяслы. Найӧ мед эськӧ вӧліны быд сідз шусяна балансӧвӧй комиссиялӧн чукӧртчылігӧн, а депутатъяскӧд мед уджаліс оланін кузя торъя компания, коді урчитіс тарифъяс, отсаліс разьны коммунальнӧй овмӧсын гӧрӧдъяссӧ. Кывкутны колӧ и меставывса юралысьяслы.
Районса ЖКХ-лысь уджсӧ донъялісны да сетісны ассьыныс вӧзйӧмъяс и «Коми теплӧвӧй компанияса» генеральнӧй директорлы отсасьысь Павел Солдатенков, государственнӧй жилищнӧй инспекцияса начальник Александр Плёнкин. А районса юралысь Сергей Каплин сӧвещаниелы кывкӧртӧд вӧчигӧн торйӧн нин пасйис, мый ӧткымынлаын лышкыдасьӧны мазутӧн, из шомӧн, пескӧн, тшын йыв лэдзӧны ассьыныс жӧ нажӧткасӧ. ЖКХ сайын, пасйис сійӧ, йӧзлӧн олӧм и миян удж.
Сідзсӧ сӧвещание дырйиыс Кулӧмдінса ЖКХ-лысь, «Тепловодоканаллысь» уджсӧ вывтісӧ эз жӧ кулитны. Мӧдарӧ на, донъялісны шӧркодьӧн да медся водзмӧстчысь, зіль войтырлы сеталісны почёт грамотаяс да сьӧма козинъяс. Найӧс вичмӧдісны архитектура, стрӧитчӧм да коммунальнӧй овмӧс кузя министерство да «Коми теплӧвӧй компания».
