БАРА НА КОРИСНЫ ВОЕНКОМАТӦ

Олӧмыд — паськыд юӧд кывтӧм кодь. Коркӧ кывтан лӧнь вомынӧд, коркӧ веськавлан гыяс пӧвстӧ. Буретш татшӧм олан туйыс Кулӧмдінысь Егор Зваричлӧн.

26 номера ГПТУ помалӧм бӧрын сійӧ 25 во гежмаліс Эжва ю, вӧлі рулевӧй мотористӧн, сэсся капитанӧн КС–100 катер вылын. Мыйтакӧ и ковмыліс мырсьыны Югыдъягсянь, Керчомъясянь пуръяс колльӧдігӧн. Да и найӧс тэчны на ковмыліс отсасьны.

Сэк, кор Чернобыльын лоис неминуча, капитанӧс бара на пӧвесткаӧн корисны военкоматӧ, лӧсьӧдчы пӧ, пиӧ, выль служба вылӧ мунны. Таӧдз сійӧ служитліс нин армияын, стройбатын салдат роксӧ паняліс. И со, позьӧ шуны, бара на мойвиис Аймусӧ дорйыны, тайӧ пӧрйӧ ыджыд ускӧттьӧысь.

Чернобыльӧ веськаліс кусӧдчысьяслӧн первой котырас. Златоустын тӧлысь велӧдчӧм бӧрын и вайисны сир курыд тшынаинӧ. Ковмис ноксьыны медся омӧль — 4-ӧд блокас. Сэні и медводдзасяньыс кӧвъяліс 5 рентген, сэсся вежон мысти бара 5 рентген. Нёрпавны заводитысь том мортӧс нуисны Иванковоса госпитальӧ, кӧні сійӧс бурдӧдіс Америкаса нималана врач Хаммер.

Чернобыльысь воӧм бӧрас Егор 6 во на капитаналіс. Но кык во мысти казяліс, мый омӧльтчӧны синъясыс. Чернобылечӧс больничасянь ыстісны первой Сыктывкарӧ, сэсся Питерӧ. Сэні сетісны 3 группаа инвалидносьт. Мортыслы вӧчисны 3 операция, 13-ысь ветліс Кировса санаторийӧ, Серёговӧ, Трускавецӧ. Висьӧмыс быттьӧ дзикӧдз нин кусыньтіс том зонмӧс, но вӧвлӧм салдат да речник эз сетчы, песіс асьсӧ, зілис кутчысьны збодера (кутшӧмӧн пыр и вӧвліс) да пыр кутіс йитӧд чужан вӧр-ваыскӧд. Вӧрӧ да ва дорӧ ветлӧмыс и сетіс збодерлунсӧ.

Ӧні Егор Зварич, коді тайӧ лунъясӧ пасйис 52 арӧс, пенсия вылын. Но инвалидӧн асьсӧ оз лыддьы. Бара на эськӧ мӧдӧдӧны санаторийӧ, но ме пӧ некытчӧ ог мун, бурджык тулысбыд кыйся.

Со татшӧм йӧз олӧны миянкӧд орччӧн. Налӧн вын-эбӧсыс да уджачлуныс и отсалӧ кутны олӧмсӧ.