КӦСЪЯН КӦ, УДЖЫД СЮРАС

Кольӧм вося июльын Вылыс Вочса школа пасйис 100 во, а августын Улыс Воч сиктӧс нимӧдісны 260 во тырӧмӧн.

Кыдзи вежсьӧ олӧмыс, сідзи вежсьӧ и сикт. Тані водзті вӧліны госпромхоз, совхоз, кооператив. Ставыс бырис. Но эз быр нэмӧвӧйся коми сиктса йӧзлӧн уджачлуныс. Коді кӧсйӧ, уджтӧ аддзӧ. Поштаын, школаын, детсадйын, клубын, лесничествоын, ФАП-ын, администрацияын, лавкаясын, «Гросс» предприятиеын, предприниматель Ю. А. Морохин дорын войтырыс зільӧны, сэсся и ас овмӧстӧ кутӧны. Лысьтан мӧскыс 124, на дорын, дерт, кукъяс. А вӧлыс 100-ысь унджык. Йӧзӧс ышӧдӧ кутчысьны тӧлка олӧмас сиктса администрация, кодӧн веськӧдлӧ Н. Ф. Морохин. Сылӧн водзмӧстчӧмӧн бӧръя кадас лоис уна бур вежсьӧм. Шуам, сиктын ӧні эмӧсь таксофонъяс, весиг и сэтшӧм ылысса грездъясын, кыдзи Вӧль, Дёма. Босьтчисны дзоньтавны посъяс. Омӧльӧсь да, йӧзыс ёна нин майшасисны. А ӧні Улыс Вочын мӧвпалӧны кыпӧдны вичко. Местасӧ вежӧдны воліс Сыктывкарса да Воркутаса епархияысь владыка Питирим. Епархиялӧн отсӧгысь кындзи вичко лэптӧм вылӧ сьӧмсӧ чукӧртасны асьныс сиктса олысьяс.