ТӦДЧЫМӦН БУРДЖЫКА

Кык вежонӧн водзджык тыртіс 2007 вося план «Немлес» котыр.

Бӧръя квайт тӧлысяс сійӧ пӧрӧдіс, кыскис да чинталіс матӧ 20 сюрс кубометрӧн. Содтас вӧр лэдзан ӧд и таво, ӧд Сыктывкарса ЛПК сетіс овмӧслы кык финскӧй комплекс, ӧти аслас вӧлі нин.

Татшӧм техникаыс неважӧн на воис и «Вылыс Эжва» ООО-ӧ. Кольӧм во техника тырмытӧмла сэні уджыс «чотіс». А таво кӧсйӧны нин заптыны 160 сюрс кубометр.

Видзӧдлыны кӧ кольӧм вося лыдпасъяс, вӧр овмӧс районын вочасӧн пыр зумыдджыка сувтӧ кок йылас. Вӧр пӧрӧдӧм да кыскӧм кузя кольӧм вося кывкӧртӧдъяс серти предприятиеяс вӧлисти воӧдчисны миллион кубометрӧдз, а водзті, кор вӧліны леспромхозъяс, тайӧ лыдпасыс вӧлі 3 миллион.

Вося стӧч лыдпасъясыс абу на дасьӧсь, та вӧсна быть лоӧ ыстысьны 11 тӧлысся вылас. На серти бура тыдалӧ ЛПК улӧ пырысь предприятиеяслӧн водзӧ мунӧмыс. Кольӧм во дінӧ «Немлес» пӧрӧдіс 150,3, кыскис 137,1 да делӧвӧй вӧрсӧ лэдзис 150 прӧчент. Тадзи жӧ содтысисны «Мобильный лес», «Эжва» ООО-лӧн Кулӧмдінса юкӧн, «Комилесбизнес» котыръяс. Тӧдчана, мый вӧр пилитан котыръяс ставныс вевтыртісны плансӧ.

ЛПК улӧ пырысь предприятиеяс таво урчитісны заптыны 800 сюрс кубометр.