«ЙӦЙТАЛӦМЫС» И ВЕЛӦДІС
Быд мортлӧн овлӧны сэтшӧм здукъяс, кор петан туйыс оз сюр. Быттьӧ гуӧ веськалан да кавшасьнысӧ он вермы. Та дырйи эськӧ оз ков шӧйӧвошны, а кутны асьтӧ киад. Сьӧлӧмнад кӧ усян да кутан шыбласьны ӧтарӧ-мӧдарӧ, нӧшта на пыдӧджык вӧян.
Казьтышта челядьдырся ӧти вӧвлӧмтор. Сиктсянь неылын вӧлі пӧжарнӧй вышка. Вель джуджыд, куим тшупӧда. Сэсянь видзӧдісны, оз-ӧ сотчы кӧнкӧ вӧрыс. Авиаотделениеыд ӧд эз на вӧв. Ми, зонпосни, радейтім ворсны вышка дорас. Гырысьджык детинкаясысь кодсюрӧ весиг кайлісны медвылысса площадкаӧдзыс. Чӧвтасны вылісяньыс курткасӧ либӧ шапкасӧ, да найӧ ылӧ-ылӧ плавгысясны-лэччасны.
Ӧтчыд смелмӧдчим Васьӧ ёрткӧд да тшӧтш кайим первой ӧти тшупӧдсӧ, сэсся мӧдсӧ. Вӧр пу йылыс ёна нин улын вӧлі.
— А, йылӧдзыс кайлам, — вӧзйис Вась, — абу ӧд ылын нин.
Ачыс сэсся и водзӧ петіс. Ӧдйӧ и шаркнитіс вышка туганас вӧчӧм будка сямаас. Мен эз жӧ ло лӧсьыд кольччыны. Тіралан кокъясӧн кыдзкӧ каттьыси жӧ бӧрсяньыс. А мичыс кутшӧм вылісяньыд вӧрыслӧн! Ар нин вӧлі да, быттьӧ зарни кисьтӧмаӧсь. Сиктным ки пыдӧс вылын моз жӧ тыдалӧ. Пукыштім пелькиник лабичас, шапкаяснымӧс чӧвтім жӧ да шуим лэччыны. А видзӧдлім уліас да тірӧмыд нӧшта ёна босьтіс. Торйӧн нин менӧ. Но и Вась эз жӧ лысьт вӧрзьӧдчыны. Вышка подулас ёртъясным горзӧны, чеччыштӧй пӧ, поланныд кӧ пос кузяыс лэччыны. Налы теш, а ми тайкӧ бӧрддзам. Татчӧ ӧмӧй кольччыны ковмас, код нӧ миянӧс лэччӧдас? Некоднанным огӧ лысьтӧй пос тшупӧдас сувтны. Ёна жӧ вылӧ кайсьӧма, муас зонпосниыс шег кодьӧсь тыдалӧны. Видзӧдлан налань да, юрыд бергӧдчӧ.
Лун джын вышка туганад пукалім. Выліад, тӧв йылад, кӧдзыд нин босьтіс. Войколавны али мый ковмас? И ӧд некутшӧм петан туй абу. Верстьӧяс пиысь некод матын оз мун ни.
Медбӧрын Васьлӧн терпенньӧыс быри. Надзӧник-надзӧник пос тшупӧдъясас шашаритчӧмӧн кутіс кыссьыны увлань. Ме ӧд сэсся ог жӧ кольччы, бӧрсяньыс вӧтчи. Вышкалӧн мӧд тшупӧдас воим да вӧлисти кокниа лолыштім.
— Муас энӧ видзӧдӧй! — горзӧны уліас ёртъяс. — Усянныд, юрыд бергӧдчас да.
Ӧні, уна во бӧрын, казьтышта сэкся йӧйталӧмнымӧс да корсюрӧ вида ачымӧс. А усим кӧ нӧ? И век жӧ сьӧлӧмӧс бурмӧда, мый верми венны полӧмӧс. Ичӧт дырйи тадзи «йӧйталӧмыс», гашкӧ, и велӧдіс вуджны ӧнія олӧмсьыс сьӧкыдлунъяссӧ.
