ТАДЗИ ОН ЖӦ ВӦЧ!

Важ коми вӧралысьяслы вӧр керка вӧлі мӧд гортӧн. Овлісны-кыйсьывлісны вежонъясӧн, тӧлысьясӧн. И гӧгӧр вӧлі дзим-дзурк. Став коланаторйыс кипод улын: чер-пила кӧть дозмук. Веськавлісны кӧ мӧд вӧр керкаӧ, эз бара пакӧститчыны.

А ӧні мый вӧчсьӧ? Локтан вӧрса кутшӧмкӧ оланінӧ да шемӧсман. Ставсӧ пасьйӧмаӧсь-жуглӧмаӧсь, гӧгӧр лӧп-ёг. Пескысла дыш ветлыны да керка пельӧссӧ кералӧмаӧсь. Кулӧмдін гӧгӧрса став вӧр керкаас татшӧм серпас. Во вит-квайт сайын тшын йыв кайис ӧтпырйӧ дас керка.

Ӧтчыд кыйсигӧн кӧсйим узьмӧдчыны тӧдса вӧралысьлӧн керкаас. Пырим да чуймим: кутшӧмкӧ мужичӧй пачас помвыв сюялӧ нар пӧвъяссӧ. Весиг дыш вӧлӧма керавны-поткӧднысӧ. И ӧд абу нин том, ар ветымына. Вӧтлыны ковмис вой улас.

Вӧрыд оз радейт дышъястӧ, горшъястӧ. Татшӧмъясыд коркӧ быть асьныс веськаласны налькйӧ.