ЛАР ВАСЬ ВОРСНЫ ДАСЬ

Эмӧсь йӧз, кодъяс оз усьны ловнас олӧмас медся сьӧкыд пӧранас. Кодсюрӧ кусыньтчӧны, юсьӧны, оз тырмы сьӧлӧм выныс да, а кодсюрӧ песӧны асьнысӧ, оз сетчыны шогыслы.

Буретш татшӧм Кулӧмдінысь Лар Вась — Василий Илларионович Тимушев. Сійӧ воштіс туйвывса неминучаын ассьыс гӧтырсӧ, колис ӧтнасӧн ыджыд овмӧсын, но кужӧ кутны асьсӧ. Катыдпомса олысьяс ставныс тӧдӧны сійӧс сибыд кӧзяинӧн, быдтор гӧгӧрвоысь суседӧн, лышкыд уджъёртӧн. Ачыс варов да озыр кыввора, сетас сӧвет да и велӧдыштас на. А велӧднысӧ опытыс эм — 35 во мырсис вӧр овмӧсын, пӧрӧдчис, таляліс лым быд пӧрӧдан пу дорӧ, бергӧдіс став уджсӧ пилорама вылын. Унджык кадсӧ зілис вӧвлӧм «Верхне-Вычегодскӧй» госпромхозын. Эз ӧд весь сетны «Уджвывса ветеран» ним да пасйыны унасьыс-уна почёт грамотаӧн.

Ӧні Лар Вась пенсия вылын. Тшӧкыда кывлӧ сылӧн кильчӧ вывсянь гудӧк шы. Тадзи сійӧ гажӧдӧ ӧткалунсӧ. Висьталӧ, мый витӧд гудӧк нин муніс ки пырыс. Бӧръяыс, Вяткаса, медся дона пӧ, сэтшӧм мыла гора, мый став олӧмтӧ вермас гартны шылад вылас. Гӧгӧрвоана, ветлысь-мунысьяс сувтлӧмӧн кывзысьӧны тайӧ шыяс дорас. Наын кылӧ олӧм дорӧ муслун, матыссаяс дінӧ тӧждлун, вӧр овмӧсын став мырсьӧм-тільсьӧм йылысь казьтылӧм. И тайӧ вӧрзьӧдӧ сьӧлӧмтӧ.