ВАЖ МОЗЫС ЗІЛЬ ДА УДЖАЧ

Иван Михайлович Турышевӧс республикаын бура тӧдӧны. Сійӧ вӧлі ас му туялысьӧн, историкӧн.

Кулӧмдін районын тӧдӧны и сылысь писӧ. Василий Иванович асьсӧ нимӧдіс мӧд боксянь. Сійӧ — туй вӧчысь. 22 во зілис ДРСУ-ын, сы лыдын 10 восӧ — грейдер вылын. А таӧдз вӧлі стрӧитчысьӧн. Торйӧн кӧ, кыпӧдіс юрсиктын телевышка, Помӧсдінын — ӧтувъя пывсян, уна олан керка. А ДРСУ-ӧ локтӧм бӧрын кытчӧ сӧмын эз веськавлы уджавнысӧ. Зілис Носим–Дереваннӧй, Ульянасянь Озъягӧ туй вӧчанінын, и карӧ туй вылын. Индывлісны и Эжва вомӧн пос вӧчанінӧ. Буретш тайӧ поссӧ помалӧм бӧрын сылы сетісны республикаса Почёт грамота.

Киподтуя мортыд и бур бать. Гӧтырыс кувсис 2000 воын, и кык пиӧс быдтӧм-велӧдӧмыс усис сылӧн пельпом вылӧ. Андрей служитнысӧ веськавліс Абхазияӧ, ӧні бара муніс Чечняӧ. Ичӧтджыкыс, Иван, лӧсьӧдчӧ жӧ мунны армияӧ.

Ӧні Василий Иванович пенсия вылын. Но важ мозыс зіль да уджач.