БӦРЪЯ ТУЙ ДА ПОМАСЬЛЫТӦМ ОЛӦМ...

Тырис во, кыдзи миян дорысь муніс Эдуард Алексеевич Тимушев. Эм сылӧн ӧти кывбур:

Бӧръя туйӧ колльӧдім ми ёртӧс,

Синва петмӧн жаль кӧть том на мортыс,

Бӧръя кывъяс колльӧдчигӧн шуам,

Асывсяньыс крепыд аскур юам.

Ӧти бӧрся мӧдӧс дозсӧ восьтам,

Сӧмын мыйкӧ курыдыс оз босьт тай.

Ю кӧть эн, оз тӧдчы сылӧн выныс,

Да и горшӧ сатшӧ табак тшыныс.

Кылӧ сӧмын виччысяна сёрни,

Вӧлі морт, а ӧні ставыс сёр нин.

Курыд шог, и дойсӧ венны колӧ,

Бӧръя туй...Да помасьлытӧм олӧм.

Быттьӧ ас йывсьыс и гижӧма. Бӧръя туяс сійӧс колльӧдім кольӧм вося декабрын. А помасьлытӧм олӧмыс, чайтсьӧ, лоӧ кывбуръясас, висьтъясас, басняясас да, дерт жӧ, матыссаясыслӧн да уджъёртъясыслӧн казьтылӧмъясын.

Пыр нюмсера, тэрыб кыввора, инас ӧшйывтӧм, збодер, быдӧн дорӧ сибыд — татшӧм сійӧ вӧлі вексӧ. Некор эз кыпӧдчыв, кӧть и ошйысянторйыс вӧлі нин: лэдзис некымын небӧг, помся йӧзӧдчис «Коми муын», «Войвыв кодзулын», «Би киньын», ӧти сайын уджаліс Коми радиоын. Петаліс литературнӧй конкурсъясын вермысьӧн, шедӧдіс Коми Республикаса Почёт грамота.

Эдик помся оліс вӧр-вакӧд йитӧдын. То Эжва вылын, то аслас муса Кадамын, кодлы сиис унасьыс-уна кывбур, то Гӧгрӧс тыдорса угоддьӧясын, кӧні радейтліс ветлыштны пищальӧн.

Менӧ виччысьӧ медмуса юӧй,

Лок пӧ вуграсьышт ме дорын, морт.

Таысь радӧйла сьӧлӧмӧй пуӧ,

Сідзкӧ, збыльысь, ме сылы бур ёрт.

Пета ю вылас, чӧв-лӧньсӧ торка,

Оз жӧ кылӧд мед, горувсӧ ну.

Ог, ог эскы, мый торъялам коркӧ

Тэкӧд, Эжваӧй, медмича ю.

Эз торъяв муса юыскӧд. Ӧні Эдик Керчомъя бердса гулыд ягын, кӧні неыліті шлывгӧ Эжва. Кулан лунас гу дорас волісны уджъёртъясыс, уна бур кывйӧн казьтылісны поэтӧс да прозаикӧс, ӧттшӧтш сиисны, мед небыдӧн да шоныдӧн лоас чужан сиктса муыс.