МЕДВОЙДӦР АС ВЫЛӦ ЛАЧАӦН
Кык пӧв содтыны ас овмӧсын скӧт видзӧм помысь йӧв-яй вӧчӧмысь субсидия, вештыны и видз-му вӧлӧга дасьтӧмысь сертификация вылӧ сьӧм, субсидиясӧ мынтыны пошта юкӧнъяс пыр. 2008–2009 вояс кежлӧ сюйны вуж выйӧныс дзоньтасян планӧ Югыдъяг-Тымсер туй, Прупт, Уюп юяс вомӧн посъяс да Немдінын выль школа стрӧитӧм, Кулӧмдінын бассейна спорткомплекс лэптӧм. Татшӧм корӧмъясӧн республикаса власьтъяс дорӧ шыӧдчисны «Коми войтыр» ӧтмунӧмлӧн Кулӧмдінса представительствоын зільысьяс.
Налӧн конференцияыс муніс ноябрь 28 лунӧ. Чукӧртчылісны районса, сикт-посёлокъясса администрацияясӧн веськӧдлысьяс, райсӧветса депутатъяс, предприятие-организацияясӧн юралысьяс, и, дерт жӧ, «Коми войтырсянь» делегатъяс.
Видлаланторйыс вӧлі уна. Кыпӧдлісны сёрни пӧшти став тӧжд-мог йылысь, мый ӧні майшӧдлӧ Эжва йывса войтырӧс. Тайӧ и туйяс вӧчӧм-дзоньталӧм, спортзалъяс стрӧитӧм, бур связь лӧсьӧдӧм, школаяс колана методическӧй пособиеясӧн могмӧдӧм, ас овмӧсын скӧт видзысьяслы субсидия мынтӧм да уджалан стаж арталӧм кузя. Районса юралысь С. П. Каплин пасйис, мый бӧръя кадас районын вежсьӧмъясыс тыдаланаӧсь. Содіс делӧвӧй вӧр вӧчӧм, промышленнӧй прӧдукция лэдзӧм кыптіс пӧшти 150 прӧчентӧдз, 2 пӧв чиніс уджтӧмалысьяслӧн лыд, 21 миллионысь унджык шайт воис районса бюджетӧ инвесторъяссянь. Ӧні районын 45 гӧгӧр ичӧт предприятие, 400 сайӧ асшӧр уджалысь. Кӧть и омӧля на сетсьӧ тӧдчанлуныс видз-му овмӧслы, районын йӧла-яя вӧлӧга вӧчӧм содыштіс.
Бурланьӧ вежсьӧмъяссӧ пасйис и республикаса Юралысь В. А. Торлопов. Торйӧн кӧ, сійӧс, мый районын унатор вӧчсьӧ «Дзоньвидзалун» нацпроект олӧмӧ пӧртӧм могысь. Райбольничаӧ воӧ выльсьыс-выль медоборудование, техника, ӧтпырйӧ куимлаын регыд воссясны модульясысь вӧчӧм ФАП-яс. Владимир Александрович неважӧн ветлӧма перинатальнӧй шӧринӧ, сэтысь казялӧма жӧ бурсӧ. Бӧръя 10 восӧ пӧ тӧлысьнас чужлӧма 200 кагаӧдз, ӧні содӧма 300-ӧдз. И Кулӧмдін районысь кага вайысьыс медуна. Юралысь ошкис юрсиктын туй вӧчысьясӧс, бур кыв шуис ичӧт бизнесын зільысьяс йылысь. Ӧтув кӧ пӧ уджавны, ставыс артмас. Со, шуам, «Троя» кузя мый дыра муніс сёрниыс, а босьтчинныд да ӧдйӧ и бырӧдінныд лёксӧ, ӧні сійӧн пӧшти некӧн оз вузасьны.
Владимир Александрович тӧдчӧдіс, мый тавосянь республикаса бюджет торъя план серти кутас юклыны сьӧм народнӧй овмӧслӧн быд юкӧнлы. Ыджыдджык тӧдчанлун лоӧ сетӧма туйяс стрӧитӧмлы, олан керкаяс лэптӧмлы, геологоразведкалы, ичӧт бизнеслы. Видз-му овмӧс сӧвмӧдӧм вылӧ содтӧд торйӧдасны 600 миллион шайт. Кулӧмдінын 2008 воын шуӧма кыпӧдны биологическӧй ломтаса котельнӧй, спорткомплекс, нюжӧдны кызвын уличаас ва.
Конференцияыс муніс сідзи, мый медводз висьтасисны делегатъяс, юӧртісны республикаса власьтъяс дорӧ ассьыныс корӧмъяссӧ. В. А. Торлопов сэсся бӧрыннас вочавидзис ставныслы, шуис, мый правительство оз коль бокӧ районса олысьяслысь тӧждъяссӧ, но ёнджыка колӧ овны ас вылӧ лачаӧн. Места вылын корсьны сьӧм, стрӧитчыны-сӧвмыны. Вочавидзисны делегатъяслӧн юалӧмъяс вылӧ и министерствоясысь да ведомствоясысь кывкутысь йӧз.
Сідзсӧ конференцияыс муніс мукӧд воын дорысь бурджыка. Но майшӧдлӧ, мый сы мында юалӧм-корӧм пиысь кызвыныс бара на вермас кольны кабала вылын.
