ДЗУГАН — КЫВКУТ

Юӧртлім нин, мый тшак-вотӧс примитан кадӧ районса юралысь Сергей Каплинлӧн индӧд серти Эжва йылын уджалісны торъя комиссияяс, кытчӧ пырисны Роспотребнадзорса, ОВД-са, райадминистрациялӧн экономика юкӧнса, сиктса овмӧдчӧминъяслӧн администрацияясса войтыр.

Найӧ донъялісны примитчанінъяслысь уджаланног, сёрнитісны йӧзкӧд, примитчысьяскӧд, кодсюрӧӧс ӧлӧдісны предпринимательство йылысь законъяс дзугӧмысь да санитарнӧй нормаяс торкалӧмысь.

Ӧти сайын комиссияяс волісны и важ кӧрт примитысьяс дорӧ. Ӧні та вылӧ быть колӧ лицензия, и ёна лоӧ ноксьыны бумагаясӧн. Та вӧсна пӧшти ставӧн, «Промресурсысь», «ППМ-Комиысь» да «Эжвастальресурсысь» ӧтдор, уджалӧны регистрируйтчытӧг, закон дзугӧмӧн.

Кӧрт чукӧртысьяс тыртӧны быд сикас шыбласнас оз сӧмын ассьыныс ӧшинь увсӧ, но и сикт-посёлокса уличаяс. Тайӧ вӧчсьӧ меставывса администрацияяслӧн, участкӧвӧйяслӧн син водзын оз нин ӧти во. Комиссиясаяс шуисны кыскыны административнӧй кывкутӧмӧ лицензиятӧг уджалысьясӧс.