ЭМ КӦ ПИСЬКӦСЛУН

Жугаліс бензопилаӧй. Важиник эськӧ, но жаль на шыбитнысӧ. А запчасьт лавкаын вывті дона, сэк жӧ мастерыс на кытысь сюрас. Тӧдсаяс висьталісны, шыӧдчывлы пӧ Александр Напалков дорӧ, сійӧ гӧгӧрвоӧ кӧрта кӧлуяд, отсалас.

И збыльысь ӧд, пилашойыд сылӧн киын ловзис. Стартёрсӧ ӧтчыд нетшыштӧмӧн и кутіс босьтны. Вӧлӧмкӧ, тайӧ мортыс техникаысь ӧтдор унатор на кужӧ вӧчавны. Шуам, электроприборъяс. Радиотелеаппаратура дзоньталӧм кузя Александр нималӧ Кулӧмдінын. А ӧд тайӧ делӧас некӧн эз велӧдчыв. Армияӧдзыс помавліс трактористӧ велӧдан курсъяс да помся уджаліс лесхозын.

— Ме быд сикас электроаппаратуранас нокся 1970 восянь нин. Школаын зэв радейті физикатӧ да кыскис тай сідз шусяна хоббиыд, — висьтасьӧ Александр Напалков. — А медводдза вӧчӧмторнас лоис ичӧтик транзистор, кодӧс сетісны дзоньтавны некутшӧм лачатӧг нин, гашкӧ пӧ, дзик нин оз шогмы. Но менам артмис. И сэксянь быттьӧ ӧзйи: босьтчи первойсӧ сьӧда-еджыда телевизоръясӧ, сэсся и уна рӧмаясӧ. Вель уналаӧ корлісны сійӧ кадӧ модаӧ пырысь цветомузыка лӧсьӧдӧм могысь.

Ӧні Александр уджтӧмалысь. Но зіль мортыд нажӧткатӧ аддзӧ аслас киподтуй помысь. Унаӧн шыӧдчылӧны сы дорӧ быд сикас прибор дзоньталӧм могысь. Ставныслы отсалӧ.

— Сиктса мортыд, писькӧс кӧ ачыс, некор оз вош, — тӧдчӧдӧ вӧчасьысь, — ме тай арнас слӧйми на бурпӧт вотчыны, содтӧд нажӧвитчыштны.

Збыльысь, татшӧм йӧзыд, кодъяс кужӧны корсьны асьнысӧ олӧмас, пикӧ некор оз воны. Киподтуйнад, писькӧслуннад да сямнад век нин аддзан петан туйсӧ.