И КОМИ-ПЕРЫМСАЛЫ — БУР ТУЙ

Водзті, кор мунан вӧлі Кулӧмдінсянь Сыктывкарӧ, кымынкӧ ошкана кыв и кывлан Кӧрткерӧсса туй дӧзьӧритысьяс йылысь.

Майбыр, оз зӧркӧд асфальтсӧ лӧсьыда вольсалӧм мир туй вылас. Ыджыд аттьӧ йӧзыс висьталӧны Кӧрткерӧс ДРСУ-са вӧвлӧм веськӧдлысь А. Кирушевлы, коді уна вын пуктіс бур туйяс лӧсьӧдӧмас.

Зіля кӧ тай уджалан, ылӧдз и нималан. Ӧні «Керосдорстрой» ООО матӧ 2 тӧлысь нин — орчча Коми-Перым кытшын нюжӧдӧ Косасянь Соликамскӧ туй. 18 километра туйвежсӧ кӧсйӧны помавны гожӧмӧдзыс. Таӧдз Кӧрткерӧсса туй вӧчысьяс зілисны Гайны районса Серебрянка посёлок дорын, помӧдз вайӧдісны матӧ 7 километра вӧлӧк.

Дерт, гортсяньыд ылынтӧ абу кокни, но туй вӧчысьяс велалӧмаӧсь нин. Оз майшӧдлы найӧс и ыджыд туйкостыс — уджаланінӧдзыс колӧ мунны 600 гӧгӧр верст.