КӦДЗЫД ТӦЛЫС ОЗ ПОВЗЬӦД?

Эжва йылын 30 школа. Найӧс дзоньталӧм да биысь видзчысьӧм могысь районса бюджетысь видзӧма 1.507 сюрс да республикасаысь 7.421 сюрс шайт.

Культура стрӧйбаяслы дзоньтасьӧм вылас район торйӧдіс 700 сюрс шайт да сы мында жӧ республика. Больничаяслы, ФАП-яслы райбюджетысь вичмис 3.110 сюрс да республика сетіс 4.729 сюрс шайт. Вель уна сьӧм — 5 миллион шайт — республика торйӧдіс и туйяс дзоньталӧм вылӧ.

Районса администрацияын неважӧн чукӧртчылігӧн сикт-посёлокса веськӧдлысьяс висьталісны, мый ыджыд удж вӧчисны уличаяс югзьӧдӧм кузя, та могысь эм «Комиэнерго» АЭК-кӧд торъя сёрнитчӧм. Кырымалӧма сёрнитчӧм и «Межрегионтоп» котыркӧд тырмымӧн из шом вайӧм кузя. Тӧв кежлӧ организация-учреждениеяслы заптӧма и пес.

Став сертиыс, район эз лёка лӧсьӧдчы тӧв кежлас. Но войвывса поводдяыд асныра. Ӧні овмӧсъясын колӧ сигӧртны коляс уджсӧ, мед кӧдзыд кадсӧ вуджны лючки.